Starfsemi Sumargjafar starfsárið 2023 – 2024

Aðalfundur Sumargjafar var haldinn í Grænuborg fimmtudaginn 6. júní 2024. Þar var flutt skýrsla um starfsemi félagsins frá aðalfundi 2023 til aðalfundar 2024. Helstu atriðin fara hér á eftir.

Aðalfundur og stjórnarkjör

Aðalfundur Sumargjafar var haldinn í Grænuborg fimmtudaginn 1. júní 2023, kl. 19:30. Þar voru venjuleg aðalfundarstörf, ársreikningur afgreiddur til áritunar og kosið í stjórn. Rósa Björg Brynjarsdóttir, sem hafði verið í stjórn frá 2013, og í aðalstjórn frá desember 2017, ákvað að draga sig í hlé. Í stað hennar kom Kristinn H. Þorsteinsson inn í aðalstjórn. Særún Sigurjónsdóttir, varamaður frá 2021, dró sig einnig í hlé. Á fundi stjórnar strax að loknum aðalfundi var ákveðið að verkaskipting verði óbreytt:

Formaður: Kristín Hagalín Ólafsdóttir

Gjaldkeri: Gerður Sif Hauksdóttir

Ritari: Sigurjón Páll Ísaksson

Meðstjórnendur: Helga Hallgrímsdóttir, Hildur Biering, Sölvi Sveinsson og Kristinn H. Þorsteinsson

Varamaður: Bergsteinn Þór Jónsson.

Verðlaunasjóður barnabóka

Sjóðurinn var stofnaður 1985 og standa að honum Forlagið, fjölskylda Ármanns Kr. Einarssonar, Íslandsdeild IBBY-samtakanna og Sumargjöf (frá 1988). Verðlaunin hafa verið veitt í 33 skipti, en alls eru verðlaunabækurnar orðnar 36.

Í fyrra féllu verðlaunin niður annað árið í röð vegna þess að ekki bárust frambærileg handrit. Verðlaunaféð (framlag Sumargjafar) átti þá að hækka í 1,0 Mkr. Ástæðuna fyrir minnkandi áhuga má að hluta a.m.k. rekja til þess að Barnabókaverðlaun Guðrúnar Helgadóttur sem stofnað var til af hálfu borgarinnar, eru að efnislegu inntaki sniðin að Verðlaunasjóði barnabóka og síðan hefur verið samkeppni um handrit á milli þessara tveggja verðlauna. Einnig eru Íslensku bókmenntaverðlaunin sem forsetinn afhendir, farin að verðlauna barnabækur. Í vetur var því ákveðið að Verðlaunasjóður barnabóka fái þá sérstöðu að verðlauna texta og myndverk; höfundar geta því verið tveir. Einnig var ákveðið að verðlaunin muni framvegis heita: Sólfaxi – Íslensku barnabókaverðlaunin. Gengið var frá nýrri reglugerð og ýmsum formsatriðum. Einnig var samþykkt að framlag Sumargjafar (verðlaunin) hækki í 1,5 Mkr. Stefnt er að því að fyrsta verðlaunabókin samkvæmt nýjum reglum verði gefin út haustið 2025. Sölvi Sveinsson er fulltrúi Sumargjafar í dómnefnd og í stjórn sjóðsins.

Styrkir

Á undanförnum árum hafa styrkir til málefna sem varða heill barna verið mikilvægur þáttur í starfsemi Sumargjafar. Vegna mikils kostnaðar við afmælisrit og skipulagsmál í Steinahlíð, var ákveðið að gera hlé á styrkveitingum á þessu ári, eins og í fyrra. Reiknað er með að taka aftur upp þráðinn á næsta ári.

Saga barna í Reykjavík

Í tilefni af 100 ára afmæli Sumargjafar nú í vor, fékk stjórnin Guðjón Friðriksson sagnfræðing til að rita sögu barna í Reykjavík þessi 100 ár. Gengið var frá samningi við Guðjón 4. júní 2019. Hann skilaði handriti í árslok 2021, og fór það síðan í yfirlestur hjá ritnefnd, en í henni eru Hildur Biering, Sigurjón Páll Ísaksson og Sölvi Sveinsson stjórnarmenn Sumargjafar. Guðjón skilaði svo fullbúnu handriti til Forlagsins 18. ágúst 2023 með myndum, myndatextum og heimildaskrá.

Varðandi útgáfu ritsins töldum við eðlilegt að leita til Forlagsins, sem við höfum unnið mikið með. Forlagið lýsti ánægju með bókina, og óskaði eftir að gefa hana út haustið 2024, og gera hana að jólabók, sem við samþykktum. Gengið var frá samkomulagi við Forlagið um útgáfuna. Umbrot bókarinnar er langt komið og verður þetta glæsileg bók.

Styrkir til útgáfunnar 

Miðstöð íslenskra bókmennta veitti Sumargjöf 750.000 kr. styrk, og barnamálaráðherra veitti 250.000 kr. styrk. Reykjavíkurborg veitti 350.000 kr. styrk til afnota af ljósmyndum úr Ljósmyndasafni Reykjavíkur, en fyrirhugað er að birta 171 mynd úr safninu.

Húsnæðismál félagsins 

Eins og fram kom í síðustu skýrslu var flutt inn í nýtt húsnæði félagsins á Hallgerðargötu 1A þann 17. mars 2023. Búið er að stofna húsfélag og sér Eignaumsjón um reksturinn. Íbúðin hentar vel sem aðstaða fyrir félagið.

Steinahlíð

Stærsta málið sem tengist Steinahlíð er fyrirhuguð Borgarlína, sem áformað er að verði lögð um suðurjaðar lóðar Steinahlíðar. Stjórn Sumargjafar hefur lagt ríka áherslu á að Borgarlínan verði þannig útfærð að lóðin skerðist sem minnst. Samkomulag liggur fyrir um skipti á landi, allt að 5.000 fermetrum, og var það undirritað í Steinahlíð 22. ágúst 2022 af borgarstjóra og formanni Sumargjafar. Veruleg óvissa er um framgang Borgarlínu og Sæbrautarstokks.

Nýr leikskóli og Ævintýraborg í Steinahlíð

Frá síðasta aðalfundi var málið í hálfgerðri biðstöðu, en vinna Alta við deiliskipulag hélt áfram fram á haustið 2023. Jón Valgeir Björnsson hjá borginni upplýsti þá að verkefnið í Steinahlíð væri komið á ís, og einnig Ævintýraborgin. Hann sagði að skipulagsvinnan nýtist ef haldið verður áfram. Hann bað um bréf um kostnaðarstöðu verksins, sem borgin mun væntanlega greiða a.m.k. að hluta.

Hljóðvist og loftgæði í Steinahlið

Þann 21. júní 2023 var fundur um hljóðvist með Myrru, hljóðstofu. Virðist hægt að uppfylla kröfur með vissum mótvægisaðgerðum.

Göngustígur í Steinahlíð

Foreldrar í Steinahlíð hafa óskað eftir göngustíg meðfram innkeyrslu til að minnka slysahættu. Málið er í skoðun hjá borginni.

Álfasteinar í Steinahlíð

Anna Lísa Guðmundsdóttir verkefnastjóri fornleifa hjá Árbæjarsafni hafði samband og spurði um örnefnið Tvísteina, og um Álfasteina við Steinahlíð. Snjólaug Guðmundsdóttir sem vann hjá Idu Ingólfsdóttur í Steinahlíð, hafði heyrt að Tvísteinar væru við húsið. Austast á lóðinni er steinn sem Elsa E. Guðjónsson lék sér við sem barn og kallaði Álfastein. Steinninn var fluttur inn á lóðina haustið 1997, með milligöngu Erlu Stefánsdóttur sjáanda, þegar lóðin var skert, sbr. Mbl. 26.09.1997.

Lóð í Steinahlíð 

Matjurtagarðurinn er nýttur af foreldrum og öðrum. Kristinn H. Þorsteinsson stjórnarmaður hefur haft umsjón með umhirðu lóðar, sem er í höndum verktaka.

Stuðningur við Grænuborg og Steinahlíð 

Sumargjöf hefur reynt að gera vel við starfsfólk í Grænuborg og Steinahlíð, til dæmis í sambandi við afmæli leikskólanna. Nýlega var samþykkt var að veita leikskólunum styrki í tilefni af 100 ára afmæli félagsins.

100 ára afmælið vorið 2024

Á síðasta vetrardag, 24. apríl, var viðtal við Kristínu H. Ólafsdóttur formann félagsins og Guðjón Friðriksson á morgunvaktinni í RÚV, og rætt um 100 ára afmælið og útgáfu á bókinni Börn í Reykjavík. Á sumardaginn fyrsta, 25. apríl, var viðtal við Kristínu í Morgunblaðinu. Þótti vel við hæfi að minnast afmælisins með þeim hætti. Þegar bókin Börn í Reykjavík kemur út í haust, verður útgáfuhóf hjá Forlaginu eða í Ráðhúsi Reykjavíkur. – Þess má geta að Kristín Dýrfjörð minntist 100 ára afmælisins á Fésbók. Einnig Björn Bjarnason fyrrverandi ráðherra á blog-síðu sinni.

Heimasíðan sumargjof.is 

Eftir að Rósa Björg Brynjarsdóttir hvarf úr stjórn hefur uppfærsla vefsíðunnar legið niðri. Sama er að segja um Fésbókarsíðu félagsins. Við það bættist að fá þurfti nýjan hýsingaraðila. Talsvert var unnið í málinu á árinu, undir umsjón Kristins H. Þorsteinssonar og er nú loksins farið að sjást til lands í málinu. Kominn er hýsingaraðili, Snerpa á Ísafirði. Rósa Björg Brynjarsdóttir sem sá um heimasíðuna, féllst á halda utan um uppfærslur fyrir okkur. Stefnt var að því að koma breyttum vef upp fyrir afmælið (25. apríl 2024), en það tókst ekki, og verður reynt að ljúka því sem fyrst. – Tímarit sem Sumargjöf gaf út eru komin inn á timarit.is, og verða þau tengd inn á vefsíðuna (Sólskin, Fóstra, Sumargjöfin, Barnadagurinn/ Barnadagsblaðið/ Sumardagurinn fyrsti). Einnig verður kynning um sögu félagsins sett þar inn, og kynning sem Kristinn var með á fundi hjá okkur um sögulega þróun Steinahlíðar.

Fjármál Sumargjafar 

Endurskoðun og ráðgjöf (Henry Örn Magnússon) hefur undanfarin ár verið endurskoðandi félagsins, og sér nú einnig um rukkun á leigu.

Annað

Í eigu Sumargjafar eru leikskólarnir Grænaborg á Skólavörðuholti og Steinahlíð við Suðurlandsbraut. Reykjavíkurborg hefur leikskólana á leigu og annast rekstur þeirra. Einnig á félagið íbúð á Hallgerðargötu 1A. Tölvupóstfang Sumargjafar er: sumargjof@simnet.is.

Continue ReadingStarfsemi Sumargjafar starfsárið 2023 – 2024

Starfsemi Sumargjafar starfsárið 2022 – 2023

Aðalfundur Sumargjafar var haldinn í Grænuborg fimmtudaginn 1. júní 2023. Þar var flutt skýrsla um starfsemi félagsins frá aðalfundi 2022 til aðalfundar 2023. Helstu atriðin fara hér á eftir.

Aðalfundur og stjórnarkjör

Aðalfundur Sumargjafar var haldinn í Grænuborg miðvikudaginn 8. júní 2022, kl. 19:30.

Þar voru venjuleg aðalfundarstörf, ársreikningur afgreiddur til áritunar og kosið í stjórn, sem var óbreytt frá fyrra ári. Á fundi stjórnar strax að loknum aðalfundi var ákveðið að verkaskipting verði óbreytt:

Formaður: Kristín Hagalín Ólafsdóttir

Gjaldkeri: Gerður Sif Hauksdóttir

Ritari: Sigurjón Páll Ísaksson

Meðstjórnendur: Helga Hallgrímsdóttir, Hildur Biering, Rósa B. Brynjarsdóttir og Sölvi Sveinsson

Varamenn: Bergsteinn Þór Jónsson, Kristinn H. Þorsteinsson og Særún Sigurjónsdóttir

Verðlaunasjóður barnabóka

Sjóðurinn var stofnaður 1985 og standa að honum Forlagið, fjölskylda Ármanns Kr. Einarssonar, Íslandsdeild IBBY-samtakanna og Sumargjöf (frá 1988).

Íslensku barnabókaverðlaunin féllu niður á síðasta ári, 2022. Þá bárust 10 handrit, þar af tvö frambærileg en hvorugt metið verðlaunahæft.

Í vetur bárust 10 handrit og komu tvö til nánari athugunar. Niðurstaðan var að fella verðlaunin niður annað árið í röð. Framlag Sumargjafar átti að hækka í 1.000.000 kr. Sölvi Sveinsson er fulltrúi Sumargjafar í dómnefnd.

Styrkir

Á undanförnum árum hafa styrkir til málefna sem varða heill barna verið mikilvægur þáttur í starfsemi Sumargjafar. Vegna mikils kostnaðar við afmælisrit og skipulagsmál í Steinahlíð, var ákveðið að gera hlé á styrkveitingum á þessu ári.

Styrkur til kaupa á gróðurhúsi í Tjarnarborg 

Tjarnarborg átti 80 ára afmæli í árslok 2021, og kom þá upp hugmynd um að gefa leikskólanum gróðurhús. Hulda Ásgeirsdóttir leikskólastjóri óskaði eftir styrk frá Sumargjöf í þessu skyni. Tjarnarborg skipar sérstakan sess hjá Sumargjöf, þar var Uppeldisskólinn stofnaður og starfaði fyrsta árið. Samþykkt var að gjöf frá útskriftarárgangi Fóstruskóla Sumargjafar 1972, renni til þessa verkefnis, og félagið bæti við þannig að upphæðin verði 300.000 kr. Gróðurhúsið var sett upp sumarið 2023.

Saga barna í Reykjavík

Í tilefni af því að Sumargjöf verður 100 ára vorið 2024, ákvað stjórnin að minnast afmælisins með því að láta rita sögu barna í Reykjavík þessi 100 ár. Í bókinni verður lýst því umhverfi sem börnin uxu upp í og leiddi til stofnunar Sumargjafar. Bókin verður í stóru broti og ríkulega myndskreytt. Guðjón Friðriksson sagnfræðingur skilaði handriti í árslok 2021. Eftir yfirlestur hjá ritnefnd, endurskoðaði Guðjón og stytti handritið, aflaði mynda og samdi myndatexta. Stefnt er að því að ritið komi út næsta vor, 2024.

Útgáfa ritsins

Stjórnin taldi eðlilegt að þreifa fyrst fyrir sér hjá Forlaginu, sem við höfum unnið mikið með. Kristín og Sölvi hittu Hólmfríði Matthíasdóttur hjá Forlaginu 17. maí 2023, og tók hún vel í að gefa út bókina. Forlagið fékk þrjá kafla og hugmynd um myndafjölda og fjölda í lit.

Húsnæðismál félagsins

Félagið hafði á leigu rúmgott herbergi í Sóltúni 20, með afnotum af kaffistofu og salerni. Stjórnin velti fyrir sér hvort ekki væri skynsamlegt að fjárfesta í húsnæði fyrir félagið. Aðstaðan í Steinahlíð var skoðuð og var ekki talin koma til greina á meðan leikskólabörn eru í gamla húsinu og starfsmannaaðstaða í Úthlíð. Í nóvember 2022 bauðst tækifæri til að kaupa nýja stúdíóíbúð á 3. hæð í Hallgerðargötu 1A. Geymsla í kjallara fylgir. Samþykkt var að kaupa hana og var gengið frá kaupsamningi í lok nóvember; með afhendingu 1. mars 2023. Andvirði íbúðar í Skipholti 5 fór í kaupin og nokkuð að auki. Í febrúar 2023 kom í ljós að við myndum missa húsnæðið í Sóltúni og var þá ákveðið að flytja aðstöðu félagsins á Hallgerðargötu 1A. Fengnir voru flutningamenn í verkið og flutt inn 17. mars 2023. Talsverð vinna var að koma sér fyrir og er aðstaðan nú orðin mjög góð.

Steinahlíð

Stærsta málið sem tengist Steinahlíð er fyrirhuguð Borgarlína, sem áformað er að verði lögð um suðurjaðar lóðar Steinahlíðar. Stjórn Sumargjafar hefur lagt ríka áherslu á að Borgarlínan verði þannig útfærð að lóðin skerðist sem minnst. Var því komið á framfæri í mati á umhverfisáhrifum, skipulagsbreytingu og hugmyndasamkeppni. Á fundi með borginni 26. apríl 2022 voru kynnt drög að samkomulagi um skipti á landi. Sumargjöf gerði nokkrar lagfæringar á samkomulaginu, í samráði við lögfræðing félagsins. Borgin samþykkti allar breytingarnar og var samkomulagið undirritað í Steinahlíð 22. ágúst 2022 af borgarstjóra og formanni Sumargjafar. Jón Valgeir Björnsson hjá Eignaskrifstofu var þar kynntur sem umsjónarmaður verkefnisins af hálfu borgarinnar. Helstu atriði samkomulagsins eru:

Fari Borgarlínan inn á lóð Steinahlíðar, Suðurlandsbraut 75, … með þeim hætti sem greinir í 1. gr. samkomulags þessa, mun Sumargjöf framselja til Reykjavíkurborgar til eignar allt að 5.000 fermetra af lóðinni Steinahlíð. Reykjavíkurborg mun í staðinn bæta við lóð Steinahlíðar sambærilegu landi og skal það liggja að lóð Steinahlíðar. Landið sem kemur í stað lands sem framselt er Reykjavíkurborg skal vera að lágmarki að mati Sumargjafar eða óháðs þriðja aðila af sömu gæðum og stærð og landið sem framselt er Reykjavíkurborg og vera nýtanlegt fyrir Steinahlíð. Reykjavíkurborg skal á sinn kostnað leggja nýja girðingu á lóðarmörkum í samráði við Sumargjöf. Að öðru leyti en að framan greinir kemur ekki til frekara endurgjalds af hálfu aðila vegna skipta á landi

Veruleg óvissa er um framgang Borgarlínu og Sæbrautarstokks.

Ráðgjafarsamningur við Alta

Þann 28. september 2022 var fundur hjá borginni þar sem samþykkt var að fá Alta sem ráðgjafa í undirbúningsvinnunni. Sumargjöf samþykkti að vera í í forsvari fyrir vinnu Alta, þó að ekki liggi fyrir samningur um kostnaðarskiptingu. Þann 12. október var fundur í Steinahlíð með Halldóru Hreggviðsdóttur frá Alta þar sem lóðin var skoðuð og rætt um mögulegan stað fyrir nýjan leikskóla, skipulag lóðar og fleira. Í framhaldinu vann Alta fyrstu drög að „Þróunaráætlun fyrir Steinahlíð“. Meginatriðið er breyting á deiliskipulagi fyrir lóðina, þar sem skilgreindur er byggingarreitur fyrir nýjan 120-200 barna leikskóla, og fyrir bráðabirgðahúsnæði á byggingartíma (Ævintýraborg). Verksamningurinn var samþykktur með smá breytingum í stjórninni og undirritaði Kristín hann fyrir hönd félagsins og Halldóra Hreggviðsdóttir fyrir hönd Alta, þann 29. nóvember 2022.

Nýr leikskóli í Steinahlíð

Borgin hefur rætt um að nýr leikskóli í Steinahlíð verði fyrir 120-200 börn. Gert er ráð fyrir 11 fm á barn, þannig að gólfflötur yrði allt að 2.200 fm. Til að minnka umfang hússins yrði það á tveimur hæðum og kjallari fyrir tæknirými undir hluta þess. Grunnflötur gæti verið 1.250 fm, sem er stórt hús. Skoðaðar hafa verið nokkrar staðsetningar. Á byggingartíma yrði starfsemin í Ævintýraborg sem rúmar 100 börn, og gæti staðið í 5 ár.

Haldnir hafa verið allmargir vinnufundir, flestir hjá Alta. Eftir fund 27. janúar 2023, kom upp biðstaða í málinu. Að beiðni Reykjavíkurborgar hafði Alta samband við Myrru hljóðstofu um að meta hljóðvist á lóðinni og mun borgin greiða þá vinnu. – Kristinn tók saman myndir og mikinn fróðleik um Steinahlíð, sem hann kynnti á stjórnarfundi 23. febrúar 2023.

Gamla Steinahlíðarhúsið

Það var lauslega metið í húsakönnun 2010 og var vilji til að friðlýsa það. Arne Finsen teiknaði það, en hann teiknaði m.a. Siglufjarðarkirkju. Pétur Ármannsson arkitekt hjá Minjastofnun þekkir vel til hússins og var ákveðið að fá hann til að skoða það. Hann kom 9. desember og leggur til að húsið verði friðað, en telur mikilvægt að því verði fundið hlutverk sem skili tekjum upp í viðhald. Friða mætti hluta af innrýminu (loftið). Með friðun má sækja um styrki til viðhalds, en það eru ekki háar upphæðir. Áður stóð við Steinahlíð garðhýsi sem flutt var að sumarbústað á Þingvöllum. Til eru teikningar af því.

Úthlíð

Pétri fannst Úthlíð stinga í stúf við gamla húsið, en talsverð verðmæti eru í húsinu, sem er innifalið í leigu.

Bekkur í Steinahlíð

Þann 26. ágúst afhenti Guðný Bjarnadóttir bekk með áletrun til minningar um Idu Ingólfsdóttur fyrsta leikskólastjóra í Steinahlíð. Bekkurinn er gjöf frá ættingjum og vinum Idu. Nokkur afgangur var af söfnunarfénu og voru í samráði við Bergstein leikskólastjóra keypt 4 borð með bekkjum fyrir börnin.

Stuðningur við starfsemi í Grænuborg og Steinahlíð

Í vetur voru afhentar viðurkenningar frá ríki og borg til vinnustaða með bestu starfskjör starfsfólks. Grænaborg lenti í öðru sæti fyrir 25-49 manna vinnustaði, og er viðurkenningarskjal komið upp á vegg þar. Sumargjöf hefur reynt að gera vel við starfsfólk í Grænuborg og Steinahlíð, til dæmis í sambandi við afmæli félagsins og leikskólanna. Ákveðið var að styrkja starfsmannafélögin árlega um 5.000 kr. á starfsmann, sem eru um 30 í Grænuborg og um 20 í Steinahlíð.

Ávöxtun fjármuna Sumargjafar

Henry Örn Magnússon endurskoðandi félagsins ráðlagði að setja hluta af innistæðum í að kaupa fasteign. Eins og fram hefur komið var fasteign keypt í vetur.

Heimasíða Sumargjafar

Rósa Björg Brynjarsdóttir hefur séð um vefsíðuna sumargjof.is og uppfært eftir þörfum. Rósa hefur stofnað Fésbókarsíðu fyrir félagið þar sem styrkir hafa verið auglýstir.

Annað

Í eigu Sumargjafar eru leikskólarnir Grænaborg og Steinahlíð. Reykjavíkurborg hefur leikskólana á leigu og annast rekstur þeirra. Tölvupóstfang Sumargjafar er: sumargjof@simnet.is.

Continue ReadingStarfsemi Sumargjafar starfsárið 2022 – 2023

Starfsemi Sumargjafar starfsárið 2021 – 2022

Aðalfundur Sumargjafar var haldinn í Grænuborg fimmtudaginn 8. júní 2022. Þar var flutt skýrsla um starfsemi félagsins frá aðalfundi 2021 til aðalfundar 2022. Helstu atriðin fara hér á eftir.

Nokkur röskun var á starfsemi félagsins á liðnu ári vegna Covid-19 faraldursins, en nú er þjóðlífið aftur að færast í eðlilegt horf.

Aðalfundur og breytingar á stjórn:

Aðalfundur Sumargjafar var haldinn í Hannesarholti þriðjudaginn 15. júní 2021, kl. 17. Þar voru venjuleg aðalfundarstörf, ársreikningar afgreiddir til áritunar og kosið í stjórn. Steinunn Jónsdóttir sem setið hafði í varastjórn frá 2010 og í aðalstjórn frá 2015, gaf ekki kost á sér og var henni þakkað ánægjulegt samstarf. Særún Sigurjónsdóttir kom ný inn í varastjórn og Sölvi Sveinsson kom úr varastjórn í aðalstjórn. Á fyrsta fundi stjórnar strax að loknum aðalfundi var ákveðið að verkaskipting verði óbreytt:

Formaður: Kristín Hagalín Ólafsdóttir

 

Gjaldkeri: Gerður Sif Hauksdóttir

Ritari: Sigurjón Páll Ísaksson

Meðstjórnendur: Helga Hallgrímsdóttir, Hildur Biering, Rósa Björg Brynjarsdóttir og Sölvi Sveinsson

Varamenn: Bergseteinn Þór Jónsson, Kristinn H. Þorsteinsson og Særún Sigurjónsdóttir

Verðlaunasjóður barnabóka

Sjóðurinn var stofnaður 1985 og standa að honum Forlagið, fjölskylda Ármanns Kr. Einarssonar, Íslandsdeild IBBY-samtakanna og Sumargjöf (frá 1988).

Íslensku barnabókaverðlaunin 2021 voru afhent 12. október, og vegna fjöldatakmarkana var athöfnin í bókabúð Forlagsins úti á Granda. Að þessu sinni hlaut Ólafur Gunnar Guðlaugsson verðlaunin fyrir bókina Ljósbera, sem er fyrsta skáldsaga hans fyrir eldri börn. Í rökstuðningi dómnefndar segir að Ljósberi sé kraftmikil og spennandi fantasía fyrir unglinga. Börn úr Vogaskóla aðstoðuðu dómnefnd við valið en alls bárust 19 handrit. Sumargjöf lagði fram verðlaunaféð 750.000 kr., en auk þess fær höfundur samningsbundin ritlaun. Þetta var í 33. sinn sem verðlaunin voru veitt, en alls eru verðlaunabækurnar orðnar 36.

Auglýst var eftir handritum fyrir næstu úthlutun, og bárust 10 handrit að barna- og unglinga­bókum. Ekkert handritanna taldist verðlaunahæft að mati dómnefndar og falla verðlaunin því niður í ár. Framlag Sumargjafar átti að vera 750.000. Það hækkar í 1.000.000 kr. árið 2023. Sölvi Sveinsson hefur verið fulltrúi Sumargjafar í dómnefnd frá ársbyrjun 2021.

Styrkir

Á undanförnum árum hefur Sumargjöf haslað sér völl sem styrktaraðili málefna sem varða heill barna. Auglýstir voru styrkir til rannsókna, lista- og þróunarverkefna í þágu barna, einkum barna á leikskólaaldri. Alls bárust 32 umsóknir en tvær komu of seint. Ákveðið var að veita átta styrki, samtals kr. 6.130.000. Styrkirnir voru afhentir í byrjun maí 2022. Hægt er að kynna sér yfirlit styrkja hér.

Styrkur til UNICEF

Vegna stríðsátaka í Úkraínu efndi UNICEF á Íslandi til söfnunar til að bæta aðstæður barna þar. Stjórn Sumargjafar ákvað að gefa eina milljón króna í söfnunina.

Saga barna í Reykjavík

Í tilefni af því að Sumargjöf verður 100 ára vorið 2024, hefur stjórnin ákveðið að minnast afmælisins með því að láta rita sögu barna í Reykjavík þessi 100 ár. Í bókinni verður lýst því umhverfi sem börnin uxu upp í og leiddi m.a. til stofnunar Sumargjafar. Bókin verður í stóru broti og ríkulega myndskreytt. Guðjón Friðriksson sagnfræðingur var ráðinn til verksins. Hann skilaði handriti í árslok 2021 og er það nú í yfirlestri hjá ritnefnd og stjórn, auk þess sem verið er að safna myndefni. Undirbúningur útgáfu verður á næsta ári, 2023. Í ritnefnd eru Hildur Biering, Sigurjón Páll Ísaksson og Sölvi Sveinsson.

Myndir af leikskólum

Matthildur Guðmundsdóttir, ekkja Jóns Freys Þórarinssonar fyrrverandi formanns Sumargjafar, afhenti félaginu litskyggnur sem hann tók af leikskólum um 1977.

Steinahlíð

Stærsta málið sem tengist Steinahlíð er fyrirhuguð Borgarlína, en áformað er að hún verði lögð um suðurjaðar lóðar Steinahlíðar. Stjórn Sumargjafar hefur lagt áherslu á að Borgarlínan verði þannig útfærð að lóðin skerðist sem minnst og helst ekkert. Var því komið á framfæri við borgina, Verkefnastofu borgarlínu og Skipulagsstofnun. Borgin viðraði þá hugmynd að hugsanleg skerðing verði bætt með skiptum á öðru landi á svæðinu. Stjórn félagsins féllst á að skoða það ef uppbótarspildan henti fyrir starfsemi Steinahlíðar, þ.e. rekstur leikskóla og sem grænt svæði, og að borgin beri allan kostnað af standsetningu lóðarinnar. – Þann 26. apríl 2022 var haldinn fundur hjá borginni, þar sem fram kom að skerðing lóðar verður að hámarki 5.000 fm í suðausturhorni, sem bætt verður upp með jafnstórri spildu að norðaustan. Borgin lagði fram drög að samkomulagi um skipti á landi. Í þriðju grein þess er viljayfirlýsing um samstarf um að þróa svæðið áfram og fjölga leikskólaplássum. Sumargjöf er með nokkrar tillögur um breytingar á samkomulaginu. Borgin hefur boðað til fundar um málið 14. júní. Lögfræðistofan Réttur hefur verið Sumargjöf til ráðuneytis varðandi Steinahlíð og borgarlínu.

Endurgerð leiksvæðis og lóðar í Steinahlíð hefur verið í biðstöðu vegna óvissu um Borgarlínu.

Úthlíð

Undirbúnings- og kaffiaðstaða starfsfólks var flutt í Úthlíð sumarið 2021 og er ánægja með aðstöðuna. Kostnaður við að standsetja húsnæðið var greiddur af Reykjavíkurborg. Skrifstofa Bergsteins Þórs Jónssonar leikskólastjóra var um haustið flutt í kjallarann í gömlu Steinahlíð. Engin starfsemi er á efstu hæð í gömlu Steinahlíð, en hinar tvær eru í fullri notkun.

Gróðurhús og matjurtagarður

Í tilefni af 70 ára afmæli Steinahlíðar 2019 var leikskólanum gefið lítið gróðurhús. Það var sett upp vorið 2021 og er nú komið í fulla notkun. Matjurtagarðurinn er talsvert nýttur af foreldrum og öðrum.

Nýting á lóð

Um tíma nutu börn úr Fossvogsskóla kennslu í húsnæði Hjálpræðishersins. Lóðin í Steinahlíð var þá nýtt sem leiksvæði og til leikfimikennslu, með leyfi Bergsteins leikskólastjóra.

Grænaborg 90 ára

Haldið var upp á afmælið 25. júní, kl. 15-17, og var fjölmenni þar, börn, foreldrar og gestir, og borgarstjórinn í Reykjavík leit inn í lokin. Nokkur úr okkar hópi mættu. Kristín H Ólafsdóttir formaður Sumargjafar ávarpaði gesti og afhenti gjafir frá félaginu, til leikskólans og til starfsmanna. Keypt var upplýsingatækniefni fyrir gjöfina. Grænaborg er elsti leikskóli á landinu.

Sumargjöf barst gjöf frá útskriftarárgangi Fóstruskóla Sumargjafar 1972

Sumargjöf á ensku

Styrkþegi spurði um enskt heiti félagsins. Kristín leitaði til Kenevu Kunz sem er löggiltur þýðandi og var niðurstaða að velja: SUMARGJOF, Friends of Children Society.

Heimasíða Sumargjafar

Rósa Björg Brynjarsdóttir hefur séð um vefsíðuna sumargjof.is og uppfært hana eftir þörfum. Einnig stofnaði hún Fésbókarsíðu, sem nýtist til að kynna styrki o.fl.

Annað

Í eigu Sumargjafar eru leikskólarnir Grænaborg og Steinahlíð. Reykjavíkurborg hefur leikskólana á leigu og annast rekstur þeirra.

Tölvupóstfang Sumargjafar er: sumargjof@simnet.is.

Sigurjón Páll Ísaksson, ritari Sumargjafar tók saman.

Continue ReadingStarfsemi Sumargjafar starfsárið 2021 – 2022

Gjöf frá útskriftarárgangi Fóstruskóla Sumargjafar 1972

Árgangurinn sem útskrifaðist frá Fóstruskóla Sumargjafar 1972 hélt í maí upp á að 50 ár voru liðin frá því að hópurinn, 34 fóstrur, útskrifaðist. Í tilefni af því söfnuðu þær nokkurri peningaupphæð og óskuðu eftir að afhenda Sumargjöf hana til styrkveitinga. Gjöfin var afhent í Grænuborg þriðjudaginn 24. maí, þar sem stjórn félagsins bauð upp á kaffiveitingar, en alls mættu 12 úr hópnum. Kristín Hagalín Ólafsdóttir, formaður félagsins, fór nokkrum orðum um Fóstruskólann og fyrstu sérmenntuðu fóstrurnar. Síðan afhenti Hildur Skarphéðinsdóttir sem hafði orð fyrir hópnum, gjöfina, og rifjaði upp skemmtilegar minningar frá árum þeirra í Fóstruskólanum. Þetta var næstsíðasti árgangurinn sem útskrifaðist áður en ríkið tók við skólanum. Stjórn Sumargjafar þakkar gjöfina og mun finna verðugt verkefni til að styrkja.

Útskriftarárgangur Fóstruskólans 1972
Útskriftarárgangur Fóstruskóla Sumargjafar 1972
Hildur Skarphéðinsdóttir og Kristín Hagalín Ólafsdóttir
Continue ReadingGjöf frá útskriftarárgangi Fóstruskóla Sumargjafar 1972

Aðalfundur 2022

Aðalfundur Barnavinafélagsins Sumargjafar verður haldinn í leikskólanum Grænuborg við Eiríksgötu í Reykjavík 8. júní nk. kl. 19:30.

Dagskrá fundarins verður sem hér segir:

  1. Skýrsla stjórnar.
  2. Endurskoðaðir reikningar félagsins kynntir og afgreiddir til áritunar.
  3. Stjórnarkjör.
  4. Önnur mál.

Núverandi stjórn Barnavinafélagsins Sumargjafar:

Formaður: Kristín Hagalín Ólafsdóttir
Gjaldkeri: Gerður Sif Hauksdóttir
Ritari: Sigurjón Páll Ísaksson
Meðstjórnendur: Helga Hallgrímsdóttir, Hildur Biering, Rósa Björg Brynjarsdóttir og Sölvi Sveinsson
Varamenn: Bergsteinn Þór Jónsson, Kristinn H. Þorsteinsson og Særún Sigurjónsdóttir.

Continue ReadingAðalfundur 2022

Styrkir 2022

Í upphafi árs 2022 auglýsti Barnavinafélagið Sumargjöf eftir umsóknum um styrki til rannsókna-, lista-, og þróunarverkefna í þágu barna þar sem sérstaklega var litið til vandaðra umsókna ætluðum börnum á leikskólaaldri. Í ár bárust 32 umsóknir og komst stjórn Sumargjafar að þeirri niðurstöðu að veita átta styrki að þessu sinni. Öllum umsækjendum hefur verið svarað. Stjórn Sumargjafar hefur ákveðið að vera ekki með formlega athöfn styrkja í ár líkt og í fyrra vegna covid.

Eftirfarandi verkefni hlutu styrki:

  1. Snillinganámskeið í grunnskólunum fyrir börn með ADHD (The OutSMARTers program). Félag um kvíðaraskanir barna, Dagmar Kr. Hannesdóttir. Rannsókn af árangri snillinganámskeiðisins sem hefur verið þróað á Þroska- og hegðunarstöð Heilsugæslunnar. 
  2. Sumarfrí Innanlands fyrir efnaminni fjölskyldur. Hjálparstarf kirkjunnar, Júlía Margrét Rúnarsdóttir.
  3. Fatakort fyrir börn á leikskólaaldri. Hjálparstarf kirkjunnar, Júlía Margrét Rúnarsdóttir.
  4. Íslenski málhljóðamælirinn. Bryndís Guðmundsdóttir. Endurbætt útgáfa, viðbætur við snjalltækjaforritið Íslenski málhljóðamælirinn (ÍM) sem skimar framburð íslensku málhljóðann og hljóðkerfisvitund hjá íslenskum börnum. 
  5. Orðaspjall. Leikskólinn Tjarnasel í Reykjanesbæ, Árdís Hrönn Jónsdóttir, leikskólastjóri og fleiri. Endurútgáfa bókarinnar Orðaspjall sem er ætluð að efla orðaforða og hlustunarskilning barna með bókalestri. Bætt verður við verkefnum sem hafa verið í þróun síðan bókin kom út 2013 og tengjast Orðaspjallsaðferðinn auk bókalista. 
  6. Ég þori! Ég get! Ég vil! Linda Ólafsdóttir. Myndlýst bók fyrir börn um Kvennafrídaginn 1975. „Stígðu ófeimin stúlka upp og stýrðu klæði, yfir geiminn yfir græði, allan heiminn skoða í næði“. Linda er höfundur texta og
    myndefnis. Bókin er hugsuð fyrir unga lesendur.
  7. 30 ára afmælistónleikar Drengjakórs Reykjavíkur. Drengjakór Reykjavíkur, Anna Hugadóttir, formaður Foreldrafélags Drengjakórsins. Kórinn er skipaður 18 drengjum á aldrinum 8 – 15 ára. Áformað er að halda tónleika 4. júní 2022 og verða þeir helgaðir íslenskri tónlist. Sjórnandi kórsins er Þorsteinn Freyr Sigurðsson.
  8. Barnadagskrá RIFF 2022. Hrönn Marinósdóttir. Sýning sérstaks námsefnis fyrir börn þar sem kvikmyndir eru notaðar sem kennslukagn og börnunum kennt kvikmyndalæsi. Myndirnar snerta einni á samfélagslegum málum og gera mögulegar vitsmunalegar umræður milli barna að sýningum loknum.
Continue ReadingStyrkir 2022

Útikennsla í Steinahlíð

Bergsteinn Þór Jónsson leikskólastjóri og Lárus Lúðvík Hilmarsson verkefnastjóri útikennslu ætla að segja frá starfi Steinahlíðar miðvikudaginn 16 mars kl. 17 – 18. Leikskólinn hefur verið þátttakandi í vest-norrænu samstarfi síðastliðið vetur en yfirskrift verkefnisins er: Sjálfbært menningar og umhverfismiðað uppeldi.

Barnavinafélaginu Sumargjöf barst vegleg gjöf á 25 ára afmælisdegi félagsins árið 1949 en það var húsið Steinahlíð við Suðurlandsbraut ásamt rúmgóðu landi með túni, görðum og trjálundum. Einkaerfingjar hjónanna Elly Scheplar Eiríksson og Halldórs Eiríkssonar stórkaupmanns gáfu félaginu Steinahlíð til minningar um foreldra sína, að ósk föður þeirra. Gjöfinni fylgdi til að mynda það skilyrði að eingöngu skyldi vera starfrækt barnaheimili á eigninni þar sem væri lögð sérstök áhersla á trjárækt og matjurtarækt. Alla tíð hefur þetta skilyrði verið haft í hávegum.

Steinahlíð fékk að gjöf Bambahús, sjálfbært gróðurhús frá félaginu í tilefni 70 ára afmælis Steinahlíðar árið 2019. Með tilkomu hússins eykst fjölbreytnin í ræktuninni, ræktunartíminn lengist og forræktun verður auðveldari. Börnin taka virkan þátt.

Slóð á fundinn:  https:// meet.google.com/hxc-yzsd-gbh

Continue ReadingÚtikennsla í Steinahlíð

End of content

No more pages to load

Newer Posts
Older Posts