Styrkir 2025 – umsóknarfrestur
Umsóknarfrestur er til og með 2. mars 2025 fyrir styrkumsóknir.
Umsækjendum er gert að fylla út umsókn sem hægt er að nálgast hér og senda það í viðhengi á netfang Sumargjafar, sumargjof@simnet.is.
Börn í Reykjavík – Íslensku bókmenntaverðlaunin 2024
Stjórn Barnavinafélagsins Sumargjafar óskar Guðjóni Friðrikssyni innilega til hamingju með íslensku bókmenntaverðlaunin 2024 í flokki fræðirita og rita almenns efnis.
Í umsögn dómnendar segir: „Börn í Reykjavík er yfirgripsmikið og fróðlegt verk um sögu barna í höfuðborginni allt frá þéttbýlismyndun til dagsins í dag. Stíllinn er leikandi léttur og skrifað er af nærfærni og næmni um málefni barna og fjölskyldna, aðbúnað þeirra og umhverfi og textinn dýpkaður með persónulegum sögum. Höfundur dregur einnig fram daglegt líf barna á tímabilinu – leikina, skemmtanirnar, skólamál og skyldurnar – og tengir þetta við þróun og breytingar í borgarsamfélaginu sem var að mótast. Sá fjöldi mynda sem prýðir bókina eykur heimildargildi hennar til muna og með þeim og lifandi frásagnarstílnum tekst Guðjóni að vekja söguna til lífs og draga upp skýra mynd af þróun samfélagsins og áhrifum hennar á börnin. Börn í Reykjavík er tímamótaverk sem er líklegt til að ná til breiðs lesendahóps og auka skilning á stöðu og veruleika barna í nútíð og þátíð.“
Börn í Reykjavík
Í ár fagnar Barnavinafélagið Sumargjöf aldarafmæli en það var stofnað þann 22. apríl 1924. Stjórn félagsins fékk til liðs við sig Guðjón Friðriksson, sagnfræðing og rithöfund til að skrásetja og lýsa lífi barna í Reykjavík síðustu 100 árin og Forlagið, bókaútgáfu til að gefa bókina út.
Í tilefni útgáfu bókarinnar Börn í Reykjavík verður blásið til útgáfuhófs í Bókabúð Forlagsins, Fiskislóð, kl. 16:30 miðvikudaginn 6. nóvember .
Bókinni er lýst sem einstakri heimild á viðburði Bókabúðar Forlagsins á facebook.
Í tilefni útgáfu bókarinnar Börn í Reykjavík eftir Guðjón Friðriksson verður blásið til útgáfuhófs í Bókabúð Forlagsins, Fiskislóð, kl 16:30 miðvikudaginn 6. nóvember. Léttar veitingar verða í boði og bókin verður seld á sérstöku tilboði.
„Bókin Börn í Reykjavík er einstök heimild. Lýst er lífi barna í Reykjavík frá því seint á 19. öld til okkar daga. Þau birtast okkur á hvunndagsfötum og sparibúin, sagt er frá leikjum þeirra og námi, félagsstarfi og skemmtunum og fjallað um ólíkar aðstæður þeirra. Sagan er rakin í glöggum og skemmtilegum texta og vel á sjötta hundrað ljósmyndum. Útkoman er einstaklega heillandi aldarspegill sem ungir og aldnir munu gleyma sér yfir.“
Starfsemi Sumargjafar starfsárið 2023 – 2024
Aðalfundur Sumargjafar var haldinn í Grænuborg fimmtudaginn 6. júní 2024. Þar var flutt skýrsla um starfsemi félagsins frá aðalfundi 2023 til aðalfundar 2024. Helstu atriðin fara hér á eftir.
Aðalfundur og stjórnarkjör
Aðalfundur Sumargjafar var haldinn í Grænuborg fimmtudaginn 1. júní 2023, kl. 19:30. Þar voru venjuleg aðalfundarstörf, ársreikningur afgreiddur til áritunar og kosið í stjórn. Rósa Björg Brynjarsdóttir, sem hafði verið í stjórn frá 2013, og í aðalstjórn frá desember 2017, ákvað að draga sig í hlé. Í stað hennar kom Kristinn H. Þorsteinsson inn í aðalstjórn. Særún Sigurjónsdóttir, varamaður frá 2021, dró sig einnig í hlé. Á fundi stjórnar strax að loknum aðalfundi var ákveðið að verkaskipting verði óbreytt:
Formaður: Kristín Hagalín Ólafsdóttir
Gjaldkeri: Gerður Sif Hauksdóttir
Ritari: Sigurjón Páll Ísaksson
Meðstjórnendur: Helga Hallgrímsdóttir, Hildur Biering, Sölvi Sveinsson og Kristinn H. Þorsteinsson
Varamaður: Bergsteinn Þór Jónsson.
Verðlaunasjóður barnabóka
Sjóðurinn var stofnaður 1985 og standa að honum Forlagið, fjölskylda Ármanns Kr. Einarssonar, Íslandsdeild IBBY-samtakanna og Sumargjöf (frá 1988). Verðlaunin hafa verið veitt í 33 skipti, en alls eru verðlaunabækurnar orðnar 36.
Í fyrra féllu verðlaunin niður annað árið í röð vegna þess að ekki bárust frambærileg handrit. Verðlaunaféð (framlag Sumargjafar) átti þá að hækka í 1,0 Mkr. Ástæðuna fyrir minnkandi áhuga má að hluta a.m.k. rekja til þess að Barnabókaverðlaun Guðrúnar Helgadóttur sem stofnað var til af hálfu borgarinnar, eru að efnislegu inntaki sniðin að Verðlaunasjóði barnabóka og síðan hefur verið samkeppni um handrit á milli þessara tveggja verðlauna. Einnig eru Íslensku bókmenntaverðlaunin sem forsetinn afhendir, farin að verðlauna barnabækur. Í vetur var því ákveðið að Verðlaunasjóður barnabóka fái þá sérstöðu að verðlauna texta og myndverk; höfundar geta því verið tveir. Einnig var ákveðið að verðlaunin muni framvegis heita: Sólfaxi – Íslensku barnabókaverðlaunin. Gengið var frá nýrri reglugerð og ýmsum formsatriðum. Einnig var samþykkt að framlag Sumargjafar (verðlaunin) hækki í 1,5 Mkr. Stefnt er að því að fyrsta verðlaunabókin samkvæmt nýjum reglum verði gefin út haustið 2025. Sölvi Sveinsson er fulltrúi Sumargjafar í dómnefnd og í stjórn sjóðsins.
Styrkir
Á undanförnum árum hafa styrkir til málefna sem varða heill barna verið mikilvægur þáttur í starfsemi Sumargjafar. Vegna mikils kostnaðar við afmælisrit og skipulagsmál í Steinahlíð, var ákveðið að gera hlé á styrkveitingum á þessu ári, eins og í fyrra. Reiknað er með að taka aftur upp þráðinn á næsta ári.
Saga barna í Reykjavík
Í tilefni af 100 ára afmæli Sumargjafar nú í vor, fékk stjórnin Guðjón Friðriksson sagnfræðing til að rita sögu barna í Reykjavík þessi 100 ár. Gengið var frá samningi við Guðjón 4. júní 2019. Hann skilaði handriti í árslok 2021, og fór það síðan í yfirlestur hjá ritnefnd, en í henni eru Hildur Biering, Sigurjón Páll Ísaksson og Sölvi Sveinsson stjórnarmenn Sumargjafar. Guðjón skilaði svo fullbúnu handriti til Forlagsins 18. ágúst 2023 með myndum, myndatextum og heimildaskrá.
Varðandi útgáfu ritsins töldum við eðlilegt að leita til Forlagsins, sem við höfum unnið mikið með. Forlagið lýsti ánægju með bókina, og óskaði eftir að gefa hana út haustið 2024, og gera hana að jólabók, sem við samþykktum. Gengið var frá samkomulagi við Forlagið um útgáfuna. Umbrot bókarinnar er langt komið og verður þetta glæsileg bók.
Styrkir til útgáfunnar
Miðstöð íslenskra bókmennta veitti Sumargjöf 750.000 kr. styrk, og barnamálaráðherra veitti 250.000 kr. styrk. Reykjavíkurborg veitti 350.000 kr. styrk til afnota af ljósmyndum úr Ljósmyndasafni Reykjavíkur, en fyrirhugað er að birta 171 mynd úr safninu.
Húsnæðismál félagsins
Eins og fram kom í síðustu skýrslu var flutt inn í nýtt húsnæði félagsins á Hallgerðargötu 1A þann 17. mars 2023. Búið er að stofna húsfélag og sér Eignaumsjón um reksturinn. Íbúðin hentar vel sem aðstaða fyrir félagið.
Steinahlíð
Stærsta málið sem tengist Steinahlíð er fyrirhuguð Borgarlína, sem áformað er að verði lögð um suðurjaðar lóðar Steinahlíðar. Stjórn Sumargjafar hefur lagt ríka áherslu á að Borgarlínan verði þannig útfærð að lóðin skerðist sem minnst. Samkomulag liggur fyrir um skipti á landi, allt að 5.000 fermetrum, og var það undirritað í Steinahlíð 22. ágúst 2022 af borgarstjóra og formanni Sumargjafar. Veruleg óvissa er um framgang Borgarlínu og Sæbrautarstokks.
Nýr leikskóli og Ævintýraborg í Steinahlíð
Frá síðasta aðalfundi var málið í hálfgerðri biðstöðu, en vinna Alta við deiliskipulag hélt áfram fram á haustið 2023. Jón Valgeir Björnsson hjá borginni upplýsti þá að verkefnið í Steinahlíð væri komið á ís, og einnig Ævintýraborgin. Hann sagði að skipulagsvinnan nýtist ef haldið verður áfram. Hann bað um bréf um kostnaðarstöðu verksins, sem borgin mun væntanlega greiða a.m.k. að hluta.
Hljóðvist og loftgæði í Steinahlið
Þann 21. júní 2023 var fundur um hljóðvist með Myrru, hljóðstofu. Virðist hægt að uppfylla kröfur með vissum mótvægisaðgerðum.
Göngustígur í Steinahlíð
Foreldrar í Steinahlíð hafa óskað eftir göngustíg meðfram innkeyrslu til að minnka slysahættu. Málið er í skoðun hjá borginni.
Álfasteinar í Steinahlíð
Anna Lísa Guðmundsdóttir verkefnastjóri fornleifa hjá Árbæjarsafni hafði samband og spurði um örnefnið Tvísteina, og um Álfasteina við Steinahlíð. Snjólaug Guðmundsdóttir sem vann hjá Idu Ingólfsdóttur í Steinahlíð, hafði heyrt að Tvísteinar væru við húsið. Austast á lóðinni er steinn sem Elsa E. Guðjónsson lék sér við sem barn og kallaði Álfastein. Steinninn var fluttur inn á lóðina haustið 1997, með milligöngu Erlu Stefánsdóttur sjáanda, þegar lóðin var skert, sbr. Mbl. 26.09.1997.
Lóð í Steinahlíð
Matjurtagarðurinn er nýttur af foreldrum og öðrum. Kristinn H. Þorsteinsson stjórnarmaður hefur haft umsjón með umhirðu lóðar, sem er í höndum verktaka.
Stuðningur við Grænuborg og Steinahlíð
Sumargjöf hefur reynt að gera vel við starfsfólk í Grænuborg og Steinahlíð, til dæmis í sambandi við afmæli leikskólanna. Nýlega var samþykkt var að veita leikskólunum styrki í tilefni af 100 ára afmæli félagsins.
100 ára afmælið vorið 2024
Á síðasta vetrardag, 24. apríl, var viðtal við Kristínu H. Ólafsdóttur formann félagsins og Guðjón Friðriksson á morgunvaktinni í RÚV, og rætt um 100 ára afmælið og útgáfu á bókinni Börn í Reykjavík. Á sumardaginn fyrsta, 25. apríl, var viðtal við Kristínu í Morgunblaðinu. Þótti vel við hæfi að minnast afmælisins með þeim hætti. Þegar bókin Börn í Reykjavík kemur út í haust, verður útgáfuhóf hjá Forlaginu eða í Ráðhúsi Reykjavíkur. – Þess má geta að Kristín Dýrfjörð minntist 100 ára afmælisins á Fésbók. Einnig Björn Bjarnason fyrrverandi ráðherra á blog-síðu sinni.
Heimasíðan sumargjof.is
Eftir að Rósa Björg Brynjarsdóttir hvarf úr stjórn hefur uppfærsla vefsíðunnar legið niðri. Sama er að segja um Fésbókarsíðu félagsins. Við það bættist að fá þurfti nýjan hýsingaraðila. Talsvert var unnið í málinu á árinu, undir umsjón Kristins H. Þorsteinssonar og er nú loksins farið að sjást til lands í málinu. Kominn er hýsingaraðili, Snerpa á Ísafirði. Rósa Björg Brynjarsdóttir sem sá um heimasíðuna, féllst á halda utan um uppfærslur fyrir okkur. Stefnt var að því að koma breyttum vef upp fyrir afmælið (25. apríl 2024), en það tókst ekki, og verður reynt að ljúka því sem fyrst. – Tímarit sem Sumargjöf gaf út eru komin inn á timarit.is, og verða þau tengd inn á vefsíðuna (Sólskin, Fóstra, Sumargjöfin, Barnadagurinn/ Barnadagsblaðið/ Sumardagurinn fyrsti). Einnig verður kynning um sögu félagsins sett þar inn, og kynning sem Kristinn var með á fundi hjá okkur um sögulega þróun Steinahlíðar.
Fjármál Sumargjafar
Endurskoðun og ráðgjöf (Henry Örn Magnússon) hefur undanfarin ár verið endurskoðandi félagsins, og sér nú einnig um rukkun á leigu.
Annað
Í eigu Sumargjafar eru leikskólarnir Grænaborg á Skólavörðuholti og Steinahlíð við Suðurlandsbraut. Reykjavíkurborg hefur leikskólana á leigu og annast rekstur þeirra. Einnig á félagið íbúð á Hallgerðargötu 1A. Tölvupóstfang Sumargjafar er: sumargjof@simnet.is.
Starfsemi Sumargjafar starfsárið 2022 – 2023
Aðalfundur Sumargjafar var haldinn í Grænuborg fimmtudaginn 1. júní 2023. Þar var flutt skýrsla um starfsemi félagsins frá aðalfundi 2022 til aðalfundar 2023. Helstu atriðin fara hér á eftir.
Aðalfundur og stjórnarkjör
Aðalfundur Sumargjafar var haldinn í Grænuborg miðvikudaginn 8. júní 2022, kl. 19:30.
Þar voru venjuleg aðalfundarstörf, ársreikningur afgreiddur til áritunar og kosið í stjórn, sem var óbreytt frá fyrra ári. Á fundi stjórnar strax að loknum aðalfundi var ákveðið að verkaskipting verði óbreytt:
Formaður: Kristín Hagalín Ólafsdóttir
Gjaldkeri: Gerður Sif Hauksdóttir
Ritari: Sigurjón Páll Ísaksson
Meðstjórnendur: Helga Hallgrímsdóttir, Hildur Biering, Rósa B. Brynjarsdóttir og Sölvi Sveinsson
Varamenn: Bergsteinn Þór Jónsson, Kristinn H. Þorsteinsson og Særún Sigurjónsdóttir
Verðlaunasjóður barnabóka
Sjóðurinn var stofnaður 1985 og standa að honum Forlagið, fjölskylda Ármanns Kr. Einarssonar, Íslandsdeild IBBY-samtakanna og Sumargjöf (frá 1988).
Íslensku barnabókaverðlaunin féllu niður á síðasta ári, 2022. Þá bárust 10 handrit, þar af tvö frambærileg en hvorugt metið verðlaunahæft.
Í vetur bárust 10 handrit og komu tvö til nánari athugunar. Niðurstaðan var að fella verðlaunin niður annað árið í röð. Framlag Sumargjafar átti að hækka í 1.000.000 kr. Sölvi Sveinsson er fulltrúi Sumargjafar í dómnefnd.
Styrkir
Á undanförnum árum hafa styrkir til málefna sem varða heill barna verið mikilvægur þáttur í starfsemi Sumargjafar. Vegna mikils kostnaðar við afmælisrit og skipulagsmál í Steinahlíð, var ákveðið að gera hlé á styrkveitingum á þessu ári.
Styrkur til kaupa á gróðurhúsi í Tjarnarborg
Tjarnarborg átti 80 ára afmæli í árslok 2021, og kom þá upp hugmynd um að gefa leikskólanum gróðurhús. Hulda Ásgeirsdóttir leikskólastjóri óskaði eftir styrk frá Sumargjöf í þessu skyni. Tjarnarborg skipar sérstakan sess hjá Sumargjöf, þar var Uppeldisskólinn stofnaður og starfaði fyrsta árið. Samþykkt var að gjöf frá útskriftarárgangi Fóstruskóla Sumargjafar 1972, renni til þessa verkefnis, og félagið bæti við þannig að upphæðin verði 300.000 kr. Gróðurhúsið var sett upp sumarið 2023.
Saga barna í Reykjavík
Í tilefni af því að Sumargjöf verður 100 ára vorið 2024, ákvað stjórnin að minnast afmælisins með því að láta rita sögu barna í Reykjavík þessi 100 ár. Í bókinni verður lýst því umhverfi sem börnin uxu upp í og leiddi til stofnunar Sumargjafar. Bókin verður í stóru broti og ríkulega myndskreytt. Guðjón Friðriksson sagnfræðingur skilaði handriti í árslok 2021. Eftir yfirlestur hjá ritnefnd, endurskoðaði Guðjón og stytti handritið, aflaði mynda og samdi myndatexta. Stefnt er að því að ritið komi út næsta vor, 2024.
Útgáfa ritsins
Stjórnin taldi eðlilegt að þreifa fyrst fyrir sér hjá Forlaginu, sem við höfum unnið mikið með. Kristín og Sölvi hittu Hólmfríði Matthíasdóttur hjá Forlaginu 17. maí 2023, og tók hún vel í að gefa út bókina. Forlagið fékk þrjá kafla og hugmynd um myndafjölda og fjölda í lit.
Húsnæðismál félagsins
Félagið hafði á leigu rúmgott herbergi í Sóltúni 20, með afnotum af kaffistofu og salerni. Stjórnin velti fyrir sér hvort ekki væri skynsamlegt að fjárfesta í húsnæði fyrir félagið. Aðstaðan í Steinahlíð var skoðuð og var ekki talin koma til greina á meðan leikskólabörn eru í gamla húsinu og starfsmannaaðstaða í Úthlíð. Í nóvember 2022 bauðst tækifæri til að kaupa nýja stúdíóíbúð á 3. hæð í Hallgerðargötu 1A. Geymsla í kjallara fylgir. Samþykkt var að kaupa hana og var gengið frá kaupsamningi í lok nóvember; með afhendingu 1. mars 2023. Andvirði íbúðar í Skipholti 5 fór í kaupin og nokkuð að auki. Í febrúar 2023 kom í ljós að við myndum missa húsnæðið í Sóltúni og var þá ákveðið að flytja aðstöðu félagsins á Hallgerðargötu 1A. Fengnir voru flutningamenn í verkið og flutt inn 17. mars 2023. Talsverð vinna var að koma sér fyrir og er aðstaðan nú orðin mjög góð.
Steinahlíð
Stærsta málið sem tengist Steinahlíð er fyrirhuguð Borgarlína, sem áformað er að verði lögð um suðurjaðar lóðar Steinahlíðar. Stjórn Sumargjafar hefur lagt ríka áherslu á að Borgarlínan verði þannig útfærð að lóðin skerðist sem minnst. Var því komið á framfæri í mati á umhverfisáhrifum, skipulagsbreytingu og hugmyndasamkeppni. Á fundi með borginni 26. apríl 2022 voru kynnt drög að samkomulagi um skipti á landi. Sumargjöf gerði nokkrar lagfæringar á samkomulaginu, í samráði við lögfræðing félagsins. Borgin samþykkti allar breytingarnar og var samkomulagið undirritað í Steinahlíð 22. ágúst 2022 af borgarstjóra og formanni Sumargjafar. Jón Valgeir Björnsson hjá Eignaskrifstofu var þar kynntur sem umsjónarmaður verkefnisins af hálfu borgarinnar. Helstu atriði samkomulagsins eru:
Fari Borgarlínan inn á lóð Steinahlíðar, Suðurlandsbraut 75, … með þeim hætti sem greinir í 1. gr. samkomulags þessa, mun Sumargjöf framselja til Reykjavíkurborgar til eignar allt að 5.000 fermetra af lóðinni Steinahlíð. Reykjavíkurborg mun í staðinn bæta við lóð Steinahlíðar sambærilegu landi og skal það liggja að lóð Steinahlíðar. Landið sem kemur í stað lands sem framselt er Reykjavíkurborg skal vera að lágmarki að mati Sumargjafar eða óháðs þriðja aðila af sömu gæðum og stærð og landið sem framselt er Reykjavíkurborg og vera nýtanlegt fyrir Steinahlíð. Reykjavíkurborg skal á sinn kostnað leggja nýja girðingu á lóðarmörkum í samráði við Sumargjöf. Að öðru leyti en að framan greinir kemur ekki til frekara endurgjalds af hálfu aðila vegna skipta á landi
Veruleg óvissa er um framgang Borgarlínu og Sæbrautarstokks.
Ráðgjafarsamningur við Alta
Þann 28. september 2022 var fundur hjá borginni þar sem samþykkt var að fá Alta sem ráðgjafa í undirbúningsvinnunni. Sumargjöf samþykkti að vera í í forsvari fyrir vinnu Alta, þó að ekki liggi fyrir samningur um kostnaðarskiptingu. Þann 12. október var fundur í Steinahlíð með Halldóru Hreggviðsdóttur frá Alta þar sem lóðin var skoðuð og rætt um mögulegan stað fyrir nýjan leikskóla, skipulag lóðar og fleira. Í framhaldinu vann Alta fyrstu drög að „Þróunaráætlun fyrir Steinahlíð“. Meginatriðið er breyting á deiliskipulagi fyrir lóðina, þar sem skilgreindur er byggingarreitur fyrir nýjan 120-200 barna leikskóla, og fyrir bráðabirgðahúsnæði á byggingartíma (Ævintýraborg). Verksamningurinn var samþykktur með smá breytingum í stjórninni og undirritaði Kristín hann fyrir hönd félagsins og Halldóra Hreggviðsdóttir fyrir hönd Alta, þann 29. nóvember 2022.
Nýr leikskóli í Steinahlíð
Borgin hefur rætt um að nýr leikskóli í Steinahlíð verði fyrir 120-200 börn. Gert er ráð fyrir 11 fm á barn, þannig að gólfflötur yrði allt að 2.200 fm. Til að minnka umfang hússins yrði það á tveimur hæðum og kjallari fyrir tæknirými undir hluta þess. Grunnflötur gæti verið 1.250 fm, sem er stórt hús. Skoðaðar hafa verið nokkrar staðsetningar. Á byggingartíma yrði starfsemin í Ævintýraborg sem rúmar 100 börn, og gæti staðið í 5 ár.
Haldnir hafa verið allmargir vinnufundir, flestir hjá Alta. Eftir fund 27. janúar 2023, kom upp biðstaða í málinu. Að beiðni Reykjavíkurborgar hafði Alta samband við Myrru hljóðstofu um að meta hljóðvist á lóðinni og mun borgin greiða þá vinnu. – Kristinn tók saman myndir og mikinn fróðleik um Steinahlíð, sem hann kynnti á stjórnarfundi 23. febrúar 2023.
Gamla Steinahlíðarhúsið
Það var lauslega metið í húsakönnun 2010 og var vilji til að friðlýsa það. Arne Finsen teiknaði það, en hann teiknaði m.a. Siglufjarðarkirkju. Pétur Ármannsson arkitekt hjá Minjastofnun þekkir vel til hússins og var ákveðið að fá hann til að skoða það. Hann kom 9. desember og leggur til að húsið verði friðað, en telur mikilvægt að því verði fundið hlutverk sem skili tekjum upp í viðhald. Friða mætti hluta af innrýminu (loftið). Með friðun má sækja um styrki til viðhalds, en það eru ekki háar upphæðir. Áður stóð við Steinahlíð garðhýsi sem flutt var að sumarbústað á Þingvöllum. Til eru teikningar af því.
Úthlíð
Pétri fannst Úthlíð stinga í stúf við gamla húsið, en talsverð verðmæti eru í húsinu, sem er innifalið í leigu.
Bekkur í Steinahlíð
Þann 26. ágúst afhenti Guðný Bjarnadóttir bekk með áletrun til minningar um Idu Ingólfsdóttur fyrsta leikskólastjóra í Steinahlíð. Bekkurinn er gjöf frá ættingjum og vinum Idu. Nokkur afgangur var af söfnunarfénu og voru í samráði við Bergstein leikskólastjóra keypt 4 borð með bekkjum fyrir börnin.
Stuðningur við starfsemi í Grænuborg og Steinahlíð
Í vetur voru afhentar viðurkenningar frá ríki og borg til vinnustaða með bestu starfskjör starfsfólks. Grænaborg lenti í öðru sæti fyrir 25-49 manna vinnustaði, og er viðurkenningarskjal komið upp á vegg þar. Sumargjöf hefur reynt að gera vel við starfsfólk í Grænuborg og Steinahlíð, til dæmis í sambandi við afmæli félagsins og leikskólanna. Ákveðið var að styrkja starfsmannafélögin árlega um 5.000 kr. á starfsmann, sem eru um 30 í Grænuborg og um 20 í Steinahlíð.
Ávöxtun fjármuna Sumargjafar
Henry Örn Magnússon endurskoðandi félagsins ráðlagði að setja hluta af innistæðum í að kaupa fasteign. Eins og fram hefur komið var fasteign keypt í vetur.
Heimasíða Sumargjafar
Rósa Björg Brynjarsdóttir hefur séð um vefsíðuna sumargjof.is og uppfært eftir þörfum. Rósa hefur stofnað Fésbókarsíðu fyrir félagið þar sem styrkir hafa verið auglýstir.
Annað
Í eigu Sumargjafar eru leikskólarnir Grænaborg og Steinahlíð. Reykjavíkurborg hefur leikskólana á leigu og annast rekstur þeirra. Tölvupóstfang Sumargjafar er: sumargjof@simnet.is.
Íslensku barnabókaverðlaunin 2022
Tilkynning frá Forlaginu:
“Dómnefnd Verðlaunasjóðs íslenskra barnabóka hefur komist að þeirri niðurstöðu að Íslensku barnabókaverðlaunin verði ekki veitt árið 2022 þar sem ekkert handrit í samkeppninni stóðst þær gæðakröfur sem gerðar eru til verðlaunabókar.”
Íslensku barnabókaverðlaunin
Fimmtudaginn 22. október voru íslensku barnabókaverðlaunin afhent. Venjan er að afhending verðlaunanna fari fram í skóla þeirra krakka sem lesa handrit bóka sem koma til greina að mati dómnefndar. Til að fylgja reglum um fjöldatakmarkanir vegna smithættu var verðlaunaafhendingin með breyttu sniði í bókabúð Forlagsins út á Granda að viðstöddum verðlaunahafa, nánustu fjölskyldu, dómnefnd og fjölmiðlum. Rut Guðnadóttir var hlutskörpust að þessu sinni með sína fyrstu bók, Vampírur, vesen og annað tilfallandi.
Vampírur, vesen og annað tilfallandi er skemmtileg og spennandi, vel skrifuð og af mikilli virðingu og næmi fyrir flóknum tilfinningum sem fylgja unglingsárunum að mati dómnefndar en einnig er sagan dásamlega fyndin.
Vampírur, vesen og annað tilfallandi fjallar um:
„Þegar furðuleg veikindi (nei, alveg pottþétt ekki Covid-19) fara að breiðast um skólann ákveða vinkonurnar Milla, Rakel og Lilja að gera eitthvað í málunum. Ekki er hægt að biðja fullorðna fólkið um hjálp, það er gagnslaust, og hver myndi svo sem trúa þremur þrettán ára stelpum sem halda því fram að stærðfræðikennarinn þeirra sé vampíra? Ófyrirsjáanleg lögbrot, vinslit og misgáfulegar málfræðireglur flækjast svo fyrir tilraunum stelpnanna til að komast að því hvort nokkuð yfirnáttúrulegt sé yfirhöfuð á kreiki.“
Að verðlaunasjóði íslenskra barnabóka standa fjölskylda Ármanns Kr. Einarssonar, sem stofnaði sjóðinn, bókaútgáfan Vaka-Helgafell sem er innan vébanda Forlagsins, IBBY á íslandi, félagasamtök áhugamanna um barnabókmenntir og barnamenningu á Íslandi og barnavinafélagið Sumargjöf. Dómnefnd skipa fulltrúar þessara aðila en einnig tveir nemendur sem voru í 8. bekk í vor og voru að þessu sinni úr Vogaskóla. Kristín Hagalín Ólafsdóttir, formaður Sumargjafar sat í nefndinni fyrir hönd Sumargjafar.
Íslensku barnabókaverðlaunin voru afhent í fyrsta skipti árið 1986 í tilefni af sjötugsafmæli rithöfundarins Ármanns Kr. Einarsson og voru afhent nú í 35. skipti. Lista yfir fyrri verðlaunabækur má sjá hér.
Aðalfundur Sumargjafar
Barnavinafélagið Sumargjöf hefur haldið aðalfund félagsins ár hvert í byrjun júní en vegna útbreiðslu COVID-19 veirunnar var fundi frestað fram til haustsins. Stjórn Sumargjafar hefur samþykkt nýja dagsetningu aðalfundar og er fundarboðið eftirfarandi:
Aðalfundur Barnavinafélagsins Sumargjafar verður haldinn í Grænuborg við Eiríksgötu, fimmtudaginn 8. október 2020, kl. 20:00.
Dagskrá fundarins verður sem hér segir:
- Skýrsla stjórnar.
- Endurskoðaðir reikningar félagsins lagðir fram til samþykktar.
- Stjórnarkjör.
- Önnur mál.
Núverandi stjórn félagsins:
Formaður: Kristín Hagalín Ólafsdóttir
Gjaldkeri: Sif Hauksdóttir
Ritari: Sigurjón Páll Ísaksson
Meðstjórnendur: Rán Einarsdóttir, Steinunn Jónsdóttir, Helga Hallgrímsdóttir og Rósa Björg Brynjarsdóttir
Varamenn: Hildur Biering, Sölvi Sveinsson og Bergsteinn Þór Jónsson.
Dagsetning styrkjaafhendingar verður birt síðar.
Styrkjafhendingu og aðalfundi frestað
Í upphafi árs 2020 auglýsti Barnavinafélagið Sumargjöf eftir umsóknum um styrki til verkefna í þágu barna. Vegna öryggisráðstafana í tengslum við útbreiðslu COVID-19 veirunnar hefur stjórn Sumargjafar ákveðið að fresta styrkjaafhendingunni sem átti að fara fram vorið 2020 um óákveðinn tíma.
Öllum umsækjendum verður svarað þegar stjórn Sumargjafar hefur komist að niðurstöðu um hvaða verkefni hljóta styrki að þessu sinni og ný dagsetning hefur verið ákveðin.
Með því að smella hér er hægt að sjá hvaða verkefni hafa hlotið styrki Sumargjafar frá árinu 1999.
Aðalfundi Sumargjafar hefur einnig verið frestað um óákveðinn tíma.
Stjórn Barnavinafélagsins Sumargjafar
Styrkir 2020
Umsóknarfrestur rann út 24. febrúar 2020. Afhending styrkja verður auglýst síðar.
Með því að smella hér er hægt að sjá hvaða verkefni hafa hlotið styrki Sumargjafar frá árinu 1999.