Dagheimili og leikskólar í Reykjavík
Barnavinafélagið Sumargjöf hafði forgöngu um að opnað yrði barnaheimili í Reykjavík árið 1924, hið fyrsta af mörgum sem á eftir fylgdu. Í flestum tilfellum lagði Reykjavíkurborg til húsnæði en Sumargjöf sá um reksturinn, frá 1935 með styrk frá Reykjavíkurborg. Einnig byggði Sumargjöf eða keypti nokkur hús fyrir starfsemina. Tengslin við borgina styrktust þegar fulltrúi Reykjavíkurborgar tók sæti í stjórn Sumargjafar árið 1958 en borgin tók svo alfarið við rekstri leikskólanna árið 1978. Í dag á Sumargjöf leikskólana Grænuborg og Steinahlíð og leigir Reykjavíkurborg húsnæðið undir rekstur leikskóla.
Breytingar á starfsemi Sumargjafar
Viðamiklar breytingar voru gerðar árið 1968 á reglugerð Barnavinafélagsins Sumargjafar um starfsemi félagsins. Í reglugerðinni var til dæmis tekið fram um fjölda barna í hinum ýmsu deildum á öllum dagheimilum og leikskólum, settar reglur um starf forstöðukvenna og nýjar reglur um innritun í leikskólana. Auk þess var getið um nokkra aðra þætti í starfseminni, til dæmis samband heimilanna við foreldra. Samkvæmt reynslu forstöðukvenna skapaði breytingin ró og festu í starfi leikskólanna. Veturinn 1968 – 1969 voru einn til tveir foreldrafundir haldnir í flestum dagheimilum og leikskólum Sumargjafar og þóttu gefa góða raun.
Guðrún Jónsdóttir félagsráðgjafi var ráðin til Sumargjafar árið 1971 en hún sá um viðtöl við foreldra sem sóttu um vist fyrir börn sín. Frá upphafi hafði innritun verið í höndum forstöðukvenna og á ábyrgð þeirra. Með fjölgun heimila og auknum þrýsingi frá almenningi um dagvistun barna, varð þessi þáttur of umsvifamikill og erfitt var fyrir forstöðukonur að sinna honum sem skyldi. Mikið hagræði þótti fólgið í því að hafa innritun á einum stað, þar sem öruggar upplýsingar lægju fyrir um fjölda umsókna og ástæður umsækjanda. Sama ár var Sólveig Björnsdóttir einnig ráðin til Sumargjafar sem uppeldislegur leiðbeinandi við barnaheimilin.
Dagheimili
Starfsemi Barnavinafélagsins Sumargjafar varð með tímanum fjölþætt og umsvifamikil. Í upphafi voru opnuð sumardagheimili (1924) en seinna meir bættust við vetrardagheimili (1938). Dagheimilin voru opin allt að sex daga vikunnar og mættu mæður með börnin sín snemma á morgnana og sóttu þau seint að deginum. Oft voru það börn efnaminni foreldra sem sóttu dagheimilin og í sumum tilfellum var maturinn sem börnin fengu þar eina staðgóða næringin sem þau nutu.
Leikskóli
Leikskóli að erlendri fyrirmynd (barnagarður, Kindergarten) var fyrst starfræktur að Amtmannsstíg 1 (1940), en leikskólar þóttu hinar nauðsynlegustu stofnanir í borgum og bæjum. Börn á aldrinum þriggja til sex ára fengu þar aðstöðu til að leika sér í hollu umhverfi undir handleiðslu hæfra starfsmanna.
Börnin glímdu þar við fjölbreytt og skemmtileg viðfangsefni sem hæfðu aldri þeirra og þroska, til að efla hugmyndaflug þeirra og þjálfa líkamann. Þau voru látin teikna, móta í leir og klippa myndir í blöð og pappa. Einnig átti að þjálfa börnin í meðferð móðurmálsins og kenna þeim vísur og söngva.
Reynslan sýndi að leikskólar veittu borgarbörnum nauðsynleg þroskaskilyrði og gegndu mikilvægu hlutverki í uppeldi borgarbarnsins. Leikskólinn gaf barninu tækifæri til að tjá sig í skapandi starfi, efldi heilbrigði þess og þroska, bæði andlegan og líkamlegan. Leikskólar Sumargjafar voru tvísetnir, kennt var bæði fyrir og eftir hádegi.
Vistheimili
Barnavinafélagið Sumargjöf rak vistheimili frá 6. október 1938 þar sem börnin dvöldu allan sólarhringinn, vikum og mánuðum saman og sá heimilið þeim fyrir öllum nauðsynjum. Vistheimili var rekið um tíma í Vesturborg, Tjarnarborg og Suðurborg, en vöggustofan í Suðurborg var síðasta vistheimilið á vegum Sumargjafar. Vöggustofa var vistheimili fyrir börn innan tveggja ára aldurs. Reykjavíkurborg tók við rekstrinum 1. maí 1952.
Barnavinafélagið Sumargjöf rak í fyrsta sinn hér á landi dagvöggustofu þegar Laufásborg opnaði árið 1952 en þangað voru tekin ungbörn til daggæslu. Árið 1962 er í fyrsta skipti minnst á skriðdeild en hún var starfrækt í Hagaborg og var fyrir börn sem voru ekki farin að ganga en þurftu ekki lengur að liggja í vöggu.
Skóladagheimili
Fyrsta skóladagheimilið var opnað árið 1971 í Reykjavíkurborg á vegum Sumargjafar. Börnin gátu stundað nám við venjulegan barnaskóla en fengu hins vegar margs konar aðstoð við heimanámið og ýmis konar aukakennslu í skóladagheimilinu.
Barnaheimili á vegum Sumargjafar
Frá árinu 1924 til 1978 þegar Reykjavíkurborg tók við rekstri leikskólanna var starfsemi eftirfarandi barnaheimila á vegum Sumargjafar:
Sumardagheimili í Kennaraháskólanum 1924 - 1926
Fljótlega eftir stofnun Barnavinafélagsins Sumargjafar 11. apríl 1924 var farið að undirbúa rekstur dagheimilis yfir sumarið og ýmsir staðir athugaðir í því sambandi. Komist var að þeirri niðurstöðu að Grænuborgartúnið væri heppilegast og fékk félagið afnot af húsnæði Kennaraskólans við Laufásveg fyrir starfsemina. Jóna Sigurjónsdóttir var ráðin forstöðukona. Dagheimilið var rekið í þessari mynd frá 1924 til 1926. Sumarið 1927 voru framkvæmdir við hús Kennaraskólans en einnig stóð yfir bygging Landspítalans sem var reistur steinsnar frá leikvelli barnanna. Leitað var að öðru húsnæði sem reyndist ófáanlegt. Ákveðið var því að leggja niður starfsemi dagheimilisins, enda hafði félagið í raun naumast bolmagn til að reka það. Félagið var nánast félaust og átti ekki kost á styrk, hvorki frá Reykjavíkurborg né ríkinu. Á árunum 1928 til 1930 lagði félagið allt kapp á að afla fjár til að reisa hús undir dagheimili.
Grænaborg 1931 - 1978
starfar enn - í eigu Sumargjafar
Þann 18. Júlí 1930 skrifuðu Steingrímur Arason formaður Barnavinafélagsins Sumargjafar og Knud Zimsen borgarstjóri undir samning um að félagið fengi land að láni á Grænuborgartúninu austan við Landspítalann, þar sem hægt væri að reisa dagheimili handa börnum.
Byggingarframkvæmdir hófust seint í maí 1931 og var húsið fullgert að kvöldi 25. júlí; hlaut það nafnið Grænaborg. Jafnframt smíði hússins var útbúinn fyrsti leikvöllurinn hér á landi sem var með sérstökum leikvallartækjum.
Starfsemi dagheimilis var allan ágústmánuð þetta sama ár. Stefanía Stefánsdóttir veitti heimilinu forstöðu þetta fyrsta sumar en Þorbjörg Árnadóttir hjúkrunarkona var ráðin forstöðukona sumarið 1932.
Börnin mættu klukkan níu að morgni og fóru heim klukkan sex að kvöldi. Flest börnin mættu fylgdarlaus nema þau allra yngstu sem voru þriggja ára.
Fóstruskólinn var starfræktur í Grænuborg frá 1954 til 1961 og starfaði hann þar í nánu sambýli og samvinnu við leikskólann.
Grænaborg var leigð undir skólastarfsemi yfir veturinn. Hún var stækkuð 1943, og var dagheimili rekið þar til ársloka 1981, fyrst yfir sumartímann, en frá 1954 var leikskóli rekinn þar allt árið.
Árið 1966 var opnuð dagheimilisdeild á Grænuborg fyrir hjúkrunarkonur sem unnu á Landspítalanum og bar Landspítalinn allan kostnað af deildinni.
Gamla Grænaborg, var á lóð sem Ríkisspítalar þurftu fyrir sína starfsemi. Samið var um að spítalarnir yfirtækju gömlu Grænuborg, gegn því að kosta tvær deildir af þremur í nýjum leikskóla á Skólavörðuholti.
Nýi leikskólinn á Skólavörðuholtinu tók til starfa í apríl 1983 og hlaut nafnið Grænaborg. Haustið 1997 var bætt þar við tveimur leikskóladeildum og lóðin stækkuð mikið. Enn þann dag í dag er húsnæði Grænuborgar í eigu Sumargjafar en Reykjavíkurborg leigir það undir rekstur leikskólans.
Stýrimannaskóli 1936
Brýn þörf var fyrir nýtt daghemili í vesturbænum. Á aðalfundi félagsins 31. janúar 1932 hóf Ísak Jónsson fyrst umræður um þetta mál. Tekjur félagsins voru bundnar við einn dag á ári, sumardaginn fyrsta og stóðu þær fyrst og fremst undir rekstrarhalla Grænuborgar. Næstu ár fóru því í mikla fjársöfnun. Sumargjöf leitaði til kennslumálaráðherra um að fá að láni húsnæði Stýrimannaskólans til að reka þar dagheimili sumarið 1936 til að mæta þörfinni fyrir nýtt dagheimili. Forstöðukona dagheimilisins var Ingunn Jónsdóttir. Samhliða rekstri dagheimilis í Stýrimannaskólanum undirbjó stjórn Sumargjafar smíði nýs húss.
Vesturborg 1937 - 1973
Bæjarráð Reykjavíkur veitti Sumargjöf umráðarétt yfir svonefndum Grundarbletti við Kaplaskjólsveg en þar voru brunarústir Elliheimilisins gamla. Uppistandandi veggir brunarústanna þóttu óskemmdir og vel nothæfir í nýja byggingu og fékk Sumargjöf leyfi frá bæjarráði til að endurbyggja húsið. Þann 12. júní 1937 hófst rekstur dagheimilisins Vesturborgar. Fyrsta forstöðukona var Anna Magnúsdóttir.
Í Vesturborg rak félagið í fyrsta skipti vetrarheimili fyrir börn veturinn 1938 til 1939. Starfsemi vetrarheimilins var tvíþætt, annars vegar var þar dagheimili með sama sniði og sumarheimili félagsins, og hins vegar deild sem var fast vistheimili þar sem börn dvöldu allan sólarhringinn, vikum og mánuðum saman og sá heimiliið þeim fyrir öllum nauðsynjum. Voru börnin á vegum Reykjavíkurborgar. Forstöðukona vetrarheimilisins var Guðrún Stephensen.
Sumarið 1938 var ný forstöðukona ráðin til starfa á Vesturborg, Bryndís Zoëga. Hún hafði lokið námi við Fröbel Höjskole í Kaupmannahöfn og var fyrsta konan á Íslandi sem hafði lokið sérstakri menntun til að starfa við dagheimili og veita þeim forstöðu. Barnavinafélagið hafði sett sér það markmið að í framtíðinni myndu eingöngu vera menntaðar stúlkur starfandi við heimilin og með komu Bryndísar var fyrsta skrefið stigið.
Sumarið 1941 féll niður öll starfsemi í Vesturborg og Grænuborg af hernaðarástæðum, vegna brottflutnings barna úr Reykjavík, og var það í fyrsta skipti síðan 1930 sem Sumargjöf rak ekki sumardagheimili í Reykjavík. Félagið tók að sér umsjón og stjórn tveggja heimila utan Reykjavíkur, á Hvanneyri og í Reykholti í Borgarfirði. Vesturborg var notuð fyrir vöggustofu sumarið 1941 og var Ingibjörg Jónsdóttir forstöðukona.
Starfsemi barnaheimilis var í húsinu þar til það brann 8. desember 1973. Vesturborg starfaði í félagsheimili Neskirkju til 5. júlí 1974, þegar heimilið var lagt niður. Forstöðukona þar var Ingibjörg Kristjánsdóttir.
Árið 1979 var byggður nýr leikskóli á Hagamel 55 og ber hann nafnið Vesturborg. Þar er nú rekinn fjögurra deilda leikskóli.
Asturborg 1940
Þörfin fyrir dagheimili var einnig orðin brýn í Austurbænum og fékk Sumargjöf húsrými í Málleysingjaskólanum á Laugavegi 108. Dagheimili var starfrækt þar sumarið 1940. Forstöðukona var Þórhildur Ólafsdóttir en hún hafði stundað nám í Svíþjóð við Social Pedagogiska Seminariet sem var skóli fyrir stúlkur sem ætluðu að starfa við og veita forstöðu barnaheimilum og leikskólum.
Amtmannsstígur 1940 - 1941
Sumargjöf fékk húsnæði að Amtmannstíg 1 árið 1940 til að opna vetrardagheimili. Húsnæðið var rúmgott og þótti því tilvalið að koma í framkvæmd hugmyndinni að leikskóla (Kindergarten). Forstöðukona var Þórhildur Ólafsdóttir sem veitt hafði dagheimilinu í Málleysingjaskólanum forstöðu. Vetrardagheimilið og leikskólinn að Amtmannsstíg 1 störfuðu aðeins þennan eina vetur og fluttist starfsemin síðan að Tjarnargötu 33.
Tjarnarborg 1941 - 1978
starfar enn undir nafninu Tjörn
Haustið 1941 festi Sumargjöf kaup á Tjarnargötu 33 fyrir starfsemi þá sem hafin var á Amtmannsstíg og fékk húsið nafnið Tjarnarborg. Í húsinu var starfsemi dagheimilis og leikskóla, auk vöggustofu sem áður hafði verið í Vesturborg. Með þessum kaupum var brotið blað í sögu félagsins. Í fyrsta sinn var húsakostur svo mikill að hægt var að halda uppi hentugri og heilbrigðri flokkun starfseminnar sem af fenginni reynslu þótti nauðsynleg. Eftirspurnin eftir plássi var mjög mikil og þurfti að vísa frá jafnmörgum börnum og tekin voru inn. Forstöðukona dagheimilisins og leikskólans var Þórhildur Ólafsdóttir en Guðrún Ö. Stephensen var forstöðukona vöggustofunnar.
Starfsemi Tjarnarborgar var margþætt. Dagheimilið var rekið árið um kring og var það í fyrsta skipti í sögu félagsins. Leikskólinn starfaði í tveimur deildum, fyrir og eftir hádegi. Vöggustofan starfaði allt árið og var það sólarhringsstarfsemi. Rekstur skóladagheimilis fyrir 6–9 ára börn hófst árið 1961 í Tjarnarborg. Fóstruskólinn fékk einnig til afnota eina leikstofu í Tjarnarborg sitt fyrsta starfsár, 1946–1947, og tvær kennslustofur frá haustinu 1962 til ársbyrjunar 1964. Fyrstu árin voru því ýmsar tegundir barnaheimila reknar í Tjarnarborg. Tjarnarborg sameinaðist leikskólanum Öldukoti árið 2009 undir nafninu Tjörn.
Suðurborg 1943 - 1952
Mikil þörf var fyrir nýtt dagheimili í Austurbænum, og eftir nokkurn undirbúning samþykkti Reykjavíkurborg vorið 1943 að kaupa húsin Eiríksgötu 37 og Hringbraut 78 (nú Þorfinnsgötu 16) og lána Sumargjöf þau til reksturs barnaheimila. Margskonar starfsemi var rekin þar frá stofnun Suðurborgar árið 1943 til ársins 1952 (þegar Laufásborg tók til starfa). Strax á fyrsta ári varð starfsemin fjórþætt. Dagheimili var á fyrstu hæð hússins að Eiríksgötu, en hafði auk þess afnot af stofu á annarri hæð hússins á Hringbraut. Leikskóli var starfræktur í tveimur deildum í húsinu að Eiríksgötu. Fyrirkomulag var svipað og í Tjarnarborg. Guðrún Stephensen veitti dagheimilinu og leikskólanum forstöðu.
Vöggustofa sem áður hafði verið til húsa í Tjarnarborg var flutt á þriðju hæð hússins við Hringbraut. Vistheimili var sett á fót á annarri hæð í húsinu við Eiríksgötu en það var fyrir börn á ýmsum aldri. Vistheimilið var lagt niður árið 1950 og kom barnaverndarnefnd Reykjavíkur börnunum sem þar dvöldu fyrir á Silungapolli og í Vesturborg. Guðrún Árnadóttir hjúkrunarkona veitti vöggustofunni forstöðu fyrst um haustið en þá tók við Ísafold Teitsdóttir hjúkrunarkona, sem hafði einnig forstöðu með vistheimilinu.
Stýrimannaskóli 1948
Sumardagheimili var starfrækt í Stýrimannaskólanum árið 1948 og veitti Svava Gunnlaugsdóttir því forstöðu.
Steinahlíð 1949 - 1978
starfar enn - í eigu Sumargjafar
Á 25 ára afmælisdegi Barnavinafélagsins Sumargjafar barst félaginu vegleg gjöf en það var húsið Steinahlíð við Suðurlandsbraut ásamt rúmgóðu landi með túni, görðum og trjálundum. Einkaerfingjar hjónanna Elly Schepler Eiríksson og Halldórs Eiríkssonar stórkaupmanns gáfu félaginu Steinahlíð til minningar um foreldra sína, að ósk föður þeirra. Gjöfinni fylgdu eftirfarandi skilyrði:
- Eignin skyldi eingöngu notuð til að starfrækja barnaheimili, þar sem væri lögð sérstök áhersla á trjárækt og matjurtarækt.
- Barnavinafélagið Sumargjöf átti að tryggja samþykki bæjarstjórnar fyrir því að landið yrði ekki skert, vegir yrðu ekki lagðir um það eða lóðum af því úthlutað.
- Félagið átti að hlúa að þeim gróðri sem var á lóðinni.
- Eignin átti að halda nafni sínu, Steinahlíð.
Hin höfðinglega gjöf lýsti vel hugarfari þeirra hjóna og barna þeirra. Ýmsu þurfti að breyta og lagfæra en starfsemi leikskóla hófst þó strax haustið 1949.
Ida Ingólfsdóttir var fyrsta forstöðukona Steinahlíðar og gengdi hún því starfi til 1982 þegar hún náði aldursmörkum, eða í 33 ár. Hún var jafnan kennd við Steinahlíð, enda bjó hún þar í risinu. Í Steinahlíð er enn í dag rekinn leikskóli og mikil áhersla lögð á trjárækt og matjurtarækt.
Uppeldisskóli Sumargjafar var starfræktur í Steinahlíð árin 1949–1952.
Í árslok 2011 fékk Reykjavíkurborg leyfi til að setja færanlegt hús á lóð Steinahlíðar. Það var tekið í notkun í ársbyrjun 2015 og eru þar reknar tvær leikskóladeildir, en sú þriðja er í gamla húsinu.
Drafnarborg 1950 - 1978
starfar enn undir nafninu Drafnarsteinn
Leikskólarnir Drafnarborg á Drafnarstíg og Barónsborg á Barónsstíg eru fyrstu leikskólarnir sem Reykjavíkurborg lét sérstaklega byggja fyrir starfsemi leikskóla. Gunnar Thoroddsen, þáverandi borgarstjóri afhenti Sumargjöf leikskólahúsin til afnota 28. september 1950 og hófst tarfsemi Drafnarborgar 13. október sama ár. Fyrsta forstöðukona leikskólans var Bryndís Zoëga og gegndi hún því starfi til 1991.
Árið 2011 var Drafnarborg sameinuð leikskólanum Dvergasteini undir nafninu Drafnarsteinn. Í dag eru 1 – 3 ára börn í Drafnarborg.
Barónsborg 1950 - 1978
starfar enn undir nafninu Miðborg
Starsemi Barónsborgar hófst 13. desember 1950. Fyrsta forstöðukonan var Guðbjörg Magnúsdóttir.
Árið 2011 var leikskólinn Barónsborg sameinaður leikskólunum Lindarborg og Njálsborg undir nafninu Miðborg.
Brákarborg 1952 - 1978
starfar enn
Borgin lét byggja nýtt hús við Brákarsund sérstaklega fyrir leikskóla eins og Barónsborg og Drafnarborg. Fyrsta forstöðukona Brákarborgar var Lára Gunnarsdóttir. Leikskólinn Brákarborg er enn starfræktur en í nýju húsnæði við Kleppsveg 150 – 152.
Laufásborg 1952 - 1978
starfar enn
Eitt það merkasta sem gerðist í sögu Sumargjafar var opnun Laufásborgar árið 1952. Á 25 ára afmæli Sumargjafar lýsti þáverandi borgarstjóri, Gunnar Thoroddsen því yfir að samstæðuhúsin að Laufásvegi 53 og 55 myndu standa Sumargjöf til boða ef samningar tækjust. Litið var á þessa yfirlýsingu sem eins konar afmælisviðurkenningu til félagsins. Umrædd hús voru afhent Sumargjöf þann 23. október 1952 við hátíðlega athöfn. Í ræðu sinni við þetta tilefni talaði borgarstjórinn um hið langa og sívaxandi samstarf Reykjavíkurborgar og Sumargjafar. Einnig hélt Jónas B. Jónsson, fræðslufulltrúi athyglisverða ræðu um þörf fyrir dagheimili og leikskóla. Formaður Sumargjafar, Ísak Jónsson skólastjóri, veitti húsunum viðtöku sem var stærsta barnaheimilið til þessa. Í Laufásborg var rekinn leikskóli, dagheimili og í fyrsta sinn dagvöggustofa hér á landi. Þórhildur Ólafsdóttir var fyrsta forstöðukona Laufásborgar.
Í dag er Laufásborg einkarekinn leikskóli af Hjallastefnunni.
Austurborg II 1958 - 1968
Árið 1958 bættist leikskólinn Austurborg II við leikskóla Sumargjafar en hann var til húsa í félagsheimili Óháða safnaðarins, Kirkjubæ við Háteigsveg. Forstöðukona Austurborgar II var Dóra Fríða Jónsdóttir. Leikskólinn starfaði til ársins 1968.
Hagaborg 1960 - 1978
starfar enn
Hagaborg við Fornhaga 8 var byggt í félagi við „Hvítabandið“. Hvítabandið átti hluta af efri hæð hússins sem var ætlað ljóslækningastarfsemi. Barnaheimilið var byggt af Reykjavíkurborg á árunum 1958–1961. Þegar byggingu hússins var lokið var það afhent Sumargjöf í makaskiptum fyrir húsnæði Tjarnarborgar (Tjarnargötu 33). Sumargjöf keypti efri hæð hússins árið 1973 af Hvítabandinu og var það notað fyrir skrifstofur félagsins.
Dagheimilisstarfsemi Tjarnarborgar var flutt í Hagaborg og hófst starfsemi í húsinu haustið 1960 þó það væri ekki fullklárað. Fyrsta forstöðukona Hagaborgar var Þórunn Einarsdóttir en hún var einnig í stjórn Sumargjafar um tíma. Auk dagheimilisins í Hagaborg var þar rekin dagvöggustofa og skriðdeild. Í dag er 5 deilda leikskóli starfræktur á báðum hæðum hússins.
Fóstruskólinn var starfræktur í Hagaborg veturinn 1961 til 1962.
Árið 1997 keypti Reykjavíkurborg húsnæðið af Sumargjöf og ríkti nokkur óvissa um hvort leikskólinn myndi starfa þar áfram en ákveðið var að Hagaborg fengi allt húsið og er leikskólinn starfandi í þeirri mynd í dag.
Hlíðaborg 1960 - 1978
starfar enn undir nafninu Hlíð
Húsnæðið við Eskihlíð var byggt árið 1955 en var fyrstu árin notað sem barnaskóli, Eskihlíðarskóli. Árið 1960 afhenti Reykjavíkurborg Sumargjöf húsnæði í Eskihlíð til að reka leikskóla. Fyrsta starfsárið fékk Sumargjöf aðeins eina stofu til umráða en fékk full umráð yfir húsinu árið 1961. Fyrsta forstöðukona Hlíðaborgar var Guðrún Guðjónsdóttir en hún var einnig í stjórn Sumargjafar um tíma.
Hlíðaborg var sameinuð leikskólanum Sólhlíð árið 2011 og ber leikskólinn í dag nafnið Hlíð.
Lindarborg 1960
Í Lindarborg við Lindargötu 50 gerði Sumargjöf tilraun með skóladagheimili fyrir 6–9 ára börn sem var rekið árið 1960, en sú starfsemi fluttist um haustið í Tjarnarborg. Forstöðukona skóladagheimilisins var Elín Torfadóttir.
Hlíðarendi 1963 - 1974
Sumargjöf fékk árið 1963 afhent húsnæði við Sunnutorg, sem Thorvaldsensfélagið hafði verið í. Dagvöggustofa var starfrækt í húsnæðinu sem bar nafnið Hlíðarendi. Fyrsta forstöðukona Hlíðarenda var Ólafía Jónsdóttir.
Starfsemin var fyrir 25 dagvöggustofu- og skriðdeildarbörn, en 1968 var bætt við 7 tveggja ára börnum í dagvist og hélst sú starfsemi til 1974, þegar lokað var vegna viðhalds. Árið 1974 tók Dyngjuborg, nýtt dagheimili til starfa steinsnar frá Hlíðarenda og tók Dyngjuborg við börnunum og starfsliði af Hlíðarenda. Hlíðarendi opnaði aftur eftir gagngerar endurbætur árið 1975 og var eftir það rekinn undir nafni Dyngjuborgar.
Hamraborg 1964 - 1978
starfar enn undir nafninu Bjartahlíð
Reykjavíkurborg byggði leikskólann Hamraborg að Grænuhlíð 24 og afhenti Sumargjöf hann til starfrækslu. Starfsemin hófst haustið 1964. Bæði byggingin og leikskólalóðin var byggð eftir ýtrustu kröfum sem giltu í nálægum löndum um gerð slíkra stofnana. Fyrsta forstöðukona Hamraborgar var Lára Gunnarsdóttir. Í húsinu var bæði dagvöggustofa og skriðdeild. Árið 2011 var leikskólinn Hamraborg sameinaður leikskólanum Sólbakka og heitir í dag Bjartahlíð.
Holtaborg I 1965 - 1969
Snemma árs 1965 tók til starfa nýr leikskóli í húsnæði K.F.U.M. og K. við Holtaveg og fékk hann nafnið Holtaborg I. Fyrsta forstöðukona Holtaborgar var Jóhanna Bjarnadóttir. Í sumarbyrjun 1969 tóku K.F.U.M. og K. húsnæðið til afnota og var starfsemi leikskólans flutt í Holtaborg II.
Jóhanna Bjarnadóttir var í stjórn Sumargjafar.
Laugaborg 1966 - 1978
starfar enn undir nafninu Laugasól
Reykjavíkurborg lét reisa myndarlegt dagheimili við Leirulæk árið 1966. Dagheimilið var vígt í maí 1966 en tók ekki að fullu til starfa fyrr en í október sama ár. Dagheimilið fékk nafnið Laugaborg og var Guðrún Guðjónsdóttir fyrsta forstöðukona heimilisins. Árið 2011 sameinaðist leikskólinn Laugaborg við leikskólann Lækjaborg og heitir sameinaður leikskóli Laugasól.
Staðarborg 1967 - 1978
Reykjavíkurborg afhenti Sumargjöf barnaheimilið Staðarborg við Mosgerði í byrjun árs 1967. Húsið var byggt 1958 og var ætlunin að reka þar leikskóla á þeim tíma en í staðinn var það notað sem barnaskóli yngri barna í Háagerðisskóla þangað til það var afhent Sumargjöf. Fyrsta forstöðukona Staðarborgar var Gyða Sigvaldadóttir. Árið 1997 fluttist hluti af börnunum og starfsfólk frá Staðarborg yfir á leikskólann Jörfa við Hæðargarð 27a.
Álftaborg 1968 - 1978
starfar enn
Reykjavíkurborg lét byggja nýjan leikskóla við Álftamýri sem fékk nafnið Álftaborg, en hann tók til starfa í byrjun árs 1968. Fyrsta forstöðukona leikskólans var Pálína Árnadóttir. Ný Álftaborg var reist árið 2007 við Safamýri 30.
Efrihlíð 1968 - 1978
Árið 1968 tók til starfa dagheimilið Efrihlíð við Norðurmýrarblett 35 (Stigahlíð 68) fyrir börn stúdenta. Ríkið átti húsnæðið en afhenti Félagsstofnun stúdenta eignina. Sumargjöf tók síðan að sér faglegan rekstur heimilisins. Fyrsta forstöðukona Efrihlíðar var Sólveig Björnsdóttir.
Í dag rekur Félagsstofnun stúdenta tvo leikskóla, Sólgarð við Eggertsgötu 8 og Mánagarð við Eggertsgötu 34.
Árborg 1969 - 1978
starfar enn
Árið 1969 var stofnaður nýr leikskóli í Hlaðbæ 17 í Árbænum sem fékk nafnið Árborg. Fyrsta forstöðukona Árborgar var Rán Einarsdóttir. Leikskólinn er starfandi á sama stað í dag, en árið 1997 var byggt við húsið.
Rán Einarsdóttir var í stjórn Sumargjafar.
Skógarborg 1969 - 1978
starfar enn undir nafninu Furuskógur
Dagheimilið Skógarborg hóf starfsemi árið 1969 og var fyrir börn hjúkrunarkvenna við Borgarspítalann. Stjórn sjúkrahússins keypti gamalt hús og lét innrétta það en Sumargjöf tók síðan að sér reksturinn. Fyrsta forstöðukona Skógarborgar var Hrafnhildur Sigurðardóttir. Árið 2011 sameinaðist Skógarborg leikskólanum Furuborg og fékk nafnið Furuskógur.
Holtaborg II 1969 - 1978
starfar enn undir nafninu Langholt
Árið 1969 tók til starfa leikskólinn Holtaborg II þegar Holtaborg I hætti störfum í húsnæði K.F.U.M. og K. við Holtaveg. Nýi leikskólinn var í nýbyggðu húsi við Sólheima 21. Jóhanna Bjarnadóttir var fyrsta forstöðukona Holtaborgar II en hún hafði áður verið forstöðukona Holtaborgar I. Árið 2011 var Holtaborg II sameinuð leikskólanum Sunnuborg og heitir í dag Langholt.
Jóhanna Bjarnadóttir var í stjórn Sumagjafar eins og kom fram hér að framan.
Sunnuborg 1970 - 1978
starfar enn undir nafninu Langholt
Barnaheimilið Sunnuborg við Sólheima 19 tók til starfa árið 1970. Reykjavíkurborg lét byggja húsið og afhenti Sumargjöf það til reksturs. Fyrsta forstöðukona Sunnuborgar var Ólafía Jónsdóttir. Árið 2011 var Sunnuborg sameinuð Holtaborg II og heitir sameinaður leikskóli Langholt.
Skóladagheimili I, Skipasundi 1971 - 1978
Í byrjun árs 1971 stofnaði Sumargjöf í fyrsta skipti skóladagheimili, þ.e. fyrir börn á fræðsluskyldualdri, en það var einnig það fyrsta sinnar tegundar í borginni. Í upphafi var það rekið í leiguhúsnæði en flutti síðan í Skipasund 80. Á skóladagheimilinu gátu börn fengið aðstoð við nám sitt og ýmiss konar aukakennslu. Fyrsta forstöðukona skóladagheimilisins að Skipasundi var Hólmfríður Jónsdóttir.
Skóladagheimili II, Heiðargerði 1971 - 1978
Í lok árs 1971 tók til starfa skóladagheimili að Heiðargerði 38. Reykjavíkurborg keypti húsnæðið en Sumargjöf sá um starfsemina. Pálína Árnadóttir var forstöðukona skóladagheimilisins að Heiðargerði.
Arnarborg 1972 - 1978
starfar enn undir nafninu Borg
Leikskólinn Arnarborg var byggður við Maríubakka og tók til starfa 1972. Fyrsta forstöðukona leikskólans var Kristín Johansen. Leikskólinn Arnarborg var sameinaður leikskólanum Fálkaborg árið 2011 og heitir í dag Borg.
Lækjarborg 1972 - 1978
starfar enn undir nafninu Laugasól
Leikskólinn Lækjaborg við Leirulæk tók til starfa í júlí 1972. Fyrsta forstöðukona Lækjabogar var Oddbjörg Jónsdóttir. Árið 2011 var Lækjaborg sameinaður leikskólanum Laugaborg og heitir í dag Laugasól.
Kvistaborg 1972 - 1978
starfar enn
Leikskólinn Kvistaborg við Kvistaland tók til starfa í september 1972. Fyrsta forstöðukona Kvistaborgar var Ásta Ólafsdóttir. Enn í dag er rekinn leikskóli í Kvistaborg.
Bakkaborg 1972 - 1978
starfar enn
Dagheimilið Bakkaborg við Blöndubakka tók til starfa í desember 1972. Fyrsta forstöðukona Bakkaborgar var Bergþóra Gústafsdóttir. Í dag er rekinn þar leikskóli.
Valhöll 1973 - 1978
Haustið1973 opnaði nýtt dagheimili við Suðurgötu 37 sem fékk nafnið Valhöll. Ríkið hafði keypt húsnæðið til þess að Félagsstofnun stúdenta ræki þar barnaheimili. Forstöðukona Valhallar var Áslaug Sigurðardóttir.
Skóladagheimili III, Skáli 1973 - 1978
Árið 1973 var gömlu húsi við Hagamel, sem áður hafði verið rekið sem fjölskylduheimili, breytt og gert að skóladagheimili. Hallgrímur Th. Björnsson var ráðinn forstöðumaður en þetta var í fyrsta skiptið sem karlmaður var ráðinn til forstöðu barnaheimilis í Reykjavík.
Fellaborg 1973 - 1978
starfar enn undir nafninu Holt
Reykjavíkurborg lét byggja nýjan leikskóla við Völvufell árið 1973 sem hlaut nafnið Fellaborg sem Sumargjöf rak. Fyrsta forstöðukona Fellaborgar var Gyða Sigvaldadóttir. Árið 2010 sameinaðist Fellaborg leikskólanum Völvuborg og heitir í dag Holt.
Selásborg 1973 - 1978
Dagheimilið Selásborg við Selásblett 6 hóf rekstur árið 1973. Fyrsta forstöðukona Selásborgar var Sigríður Gísladóttir. Leikskólinn Rofaborg sem tók til starfa 1985 er þar sem Selásborg var, lóðirnar voru sameinaðar 1995.
Austurborg II 1974 - 1978
starfar enn
Leikskólinn Austurborg tók til starfa 1. júlí 1974 við Háaleitisbraut 70, við hliðina á Grensárkirkju. Hann er fjögurra deilda með börn á aldrinum tveggja til sex ára. Fyrsta forstöðukona Austurborgar var Pálína Árnadóttir. Leikskólinn er enn starfandi í dag.
Dyngjuborg 1974 - 1978
Leikskólinn Dyngjuborg tók til starfa 20. ágúst 1974, ætlað 35 börnum. Fyrsta forstöðukona Dyngjuborgar var Guðrún Birna Guðmundsdóttir.
Reykjavíkurborg stofnsetti leikskólann í hluta af húsnæði Thorvaldsensfélagsins við Dyngjuveg, steinsnar frá leikskólanum Hlíðarenda. Dyngjuborg tók við börnum og starfsliði af Hlíðarenda. Frá árinu 1975 þegar Hlíðarendi opnaði aftur eftir gagngerar breytingar voru leikskólarnir tveir sameinaðir undir nafni Dyngjuborgar.
Völvuborg 1974 - 1978
starfar enn undir nafninu Holt
Leikskólinn Völvuborg tók til starfa 13. nóvember 1974 í Efra-Breiðholti. Fyrsta forstöðukona Völvuborgar var Rósa Fenger.
Leikskólinn Völvuborg var sameinaður leikskólanum Fellaborg árið 2010 og ber sameinaður leikskóli nafnið Holt.
Múlaborg 1975 - 1978
starfar enn
Leikskólinn Múlaborg tók til starfa árið 1975. Fyrsta forstöðukona Múlaborgar var Ingibjörg Kristín Jónsdóttir en hún var í stjórn Sumargjafar.´
Í upphafi rak styrktarfélag lamaðra og fatlaðra eina deild fyrir fötluð börn í Múlaborg.
Skóladagheimili í Auðarstræti 3
Skóladagheimili í Auðarstræti 3 tók til starfa í október 1976. Forstöðumaður var Trausti Ólafsson.
Hólaborg 1977 - 1978
starfar enn
Leikskólinn Hólaborg við Suðurhóla í Efra-Breiðholti tók til starfa 9. maí 1977. Fyrsta forstöðukona Hólaborgar var Lilja Torp. Leikskólinn er enn starfandi.
Seljaborg 1977 - 1978
starfar enn
Leikskólinn Seljaborg tók til starfa 15. júlí 1977. Fyrsta forstöðukona Seljaborgar var Elín Jóna Þórsdóttir. Leikskólinn er enn starfandi.