Styrkir 2016 | Rósa Björg | Page 2

All posts by Rósa Björg

Styrkir 2016 | Rósa Björg | Page 2

Styrkir 2016

Umsóknarfrestur rann út 15. febrúar 2016. Styrkir verða afhentir í lok apríl, nánar auglýst síðar. 

Með því að smella hér er hægt að sjá hvaða verkefni hafa hlotið styrki Sumargjafar frá árinu 1999

Styrkir 2016 | Rósa Björg | Page 2

Umsókn um styrk árið 2016

Barnavinafélagið Sumargjöf auglýsir hér með til umsóknar styrki á sviði rannsókna, lista og þróunarverkefna í þágu barna.

Vakin er athygli á að umsækjendum er gert að fylla út umsókn á sérstöku eyðublaði sem vistað er á vef félagsins og senda það síðan í viðhengi á tölvupóstfang Sumargjafar sumargjof@simnet.is að lokinni útfyllingu.

Stjórn Sumargjafar áskilur sér rétt til að óska eftir nánari upplýsingum um verkefnin og leita umsagnar fagaðila.

Umsóknarfrestur er til og með 15. febrúar 2016.

Reykjavík, 14. janúar 2016
Barnavinafélagið Sumargjöf

Póstfang: Pósthólf 5423, 125 Reykjavík
Tölvupóstfang: sumargjof@simnet.is
Vefur: sumargjof.is

Styrkir 2016 | Rósa Björg | Page 2

Starfsemi Sumargjafar veturinn 2014 – 2015

Steinahlíð
Færanlega húsið í Steinahlíð, sem Reykjavíkurborg setti upp í árslok 2011, var tekið í notkun um síðustu áramót. Húsið er kallað Steinagerði en þar eru nú reknar tvær leikskóladeildir og sú þriðja er í gamla húsinu. Reksturinn hefur gengið vel og mun styrkja stöðu Steinahlíðar til framtíðar. Gerður var samningur við Reykjavíkurborg um ýmis fjárhagsleg atriði tengd rekstri hússins. Að undanförnu hefur verið til kynningar nýtt deiliskipulag í Steinahlíð, um innkeyrslu á lóð og bílastæði; niðurstaða liggur ekki fyrir.

Grænaborg
Reykjavíkurborg hefur verið með þreifingar um að byggja við Grænuborg og bæta þar við einni deild. Sumargjöf hefur fallist á að málið sé skoðað, en það er nú í biðstöðu.

Barnabókasjóður
LeitinAdBlodey-175x267Sjóðurinn var stofnaður 1985 og standa að honum Forlagið, fjölskylda Ármanns Kr. Einarssonar, Íslandsdeild IBBY-samtakanna og Sumargjöf (frá 1988). Barnabókaverðlaunin voru afhent í Langholtsskóla 16. október 2014, og var það í 26. sinn sem þau voru veitt, en alls eru verðlaunabækurnar 29. Að þessu sinni fékk Guðni Líndal Benediktsson verðlaunin fyrir skáldsöguna: Leitin að Blóðey – Ótrúleg ævintýri afa, sem er fyrsta bók höfundar, spennandi og bráðfyndin saga ætluð 7-12 ára lesendum; myndir gerði Ivan Capelli. Sumargjöf lagði fram verðlaunaféð, 500.000 kr, en auk þess fær höfundur samningsbundin ritlaun. Auglýst var eftir handritum fyrir næstu úthlutun og bárust 28 handrit að barna- og unglingabókum. Búið er að velja verðlaunabók og verður hún kynnt og gefin út í haust. Kristín Ólafsdóttir er að þessu sinni fulltrúi Sumargjafar í dómnefnd. – Verðlaunabækurnar eru orðnar veglegur bókaflokkur og hefur vel tekist til með starfsemi sjóðsins.

Styrkir
Á undanförnum árum hefur Sumargjöf haslað sér völl sem styrktaraðili málefna sem varða heill barna. Eins og í fyrra voru auglýstir styrkir til rannsókna, lista og þróunarverkefna, sem geta nýst börnum á leik- og grunnskólaaldri. Alls bárust 40 umsóknir sem margar voru áhugaverðar. Ákveðið var að veita ellefu styrki, samtals 6.550.000 krónur. Styrkirnir voru afhentir við hátíðlega athöfn í Grænuborg sunnudaginn 3. maí 2015, að viðstöddum gestum.

Aldingarður æskunnar
Verkefnið hófst í Steinahlíð 25. júní 2014 með því að börnin gróðursettu eplatré, rifs o.fl. Garðyrkjufélag Íslands og Sumargjöf standa að verkefninu sem heldur áfram í ár. Verið er að útbúa grænmetisgarð í Steinahlíð fyrir foreldra barna þar.

Handbók: Snemmtæk íhlutun í málörvun 2-3 ára barnasnemmtæk íhlutun
Í tilefni af 90 ára afmæli félagsins 2014 gaf Sumargjöf öllum leikskólum í Reykjavík eintak af þessari bók, bæði borgarreknu leikskólunum og þeim einkareknu. Félagið væntir þess að bókin nýtist vel í leikskólastarfi.

Stóra upplestrarkeppnin
Sumargjöf hefur um mörg undanfarin ár styrkt samtökin Raddir, sem sjá um Stóru upplestrarkeppnina í skólum. Styrkurinn nam nú 500.000 kr.

Heimasíða Sumargjafar
Í tilefni af 90 ára afmæli Sumargjafar á síðasta ári var ákveðið að endurbæta heimasíðu félagsins, sumargjof.is. Rósa Björg Brynjarsdóttir hefur unnið að málinu og er nú hægt að nálgast mun meiri upplýsingar um starfsemi félagsins en áður var.

Bernskan
Sumargjöf er aðili að Bernskunni – Íslandsdeild OMEP samtakanna. Bernskan samnýtir húsnæðið í Skipholti 5, og hefur þar eitt herbergi og aðgang að fundarherbergi.

Annað
Í eigu Sumargjafar eru leikskólarnir Grænaborg og Steinahlíð. Reykjavíkurborg leigir leikskólana og sér um rekstur þeirra. Einnig á Sumargjöf 76 m2 skrifstofuhúsnæði á þriðju hæð í Skipholti 5. Þar eru geymd ýmis söguleg gögn félagsins, auk þess sem þar er góð fundaraðstaða. Tölvupóstfang Sumargjafar er: sumargjof@simnet.is.

Styrkir 2016 | Rósa Björg | Page 2

Styrkveitingar Sumargjafar til málefna barna

 

styrkir_2015Í upphafi árs 2015 auglýsti Sumargjöf eftir umsóknum um styrki til verkefna í þágu barna. Alls bárust 40 umsóknir. Stjórn félagsins komst að þeirri niðurstöðu að veita ellefu styrki. Afhending styrkja fór fram þann 3. maí í leikskólanum Grænuborg við Eiríksgötu í Reykjavík. Eftirtalin verkefni hlutu styrkina að þessu sinni (til að fá nánari lýsingu á verkefnunum veljið hvert verkefni fyrir sig):

1. Gerð sjónvarpsmyndar um Barnasáttmála Sameinuðu þjóðanna í tilefni 25 ára afmælis sáttmálans.

Þann 20. nóvember 2014 var 25 ára afmæli barnasáttmála SÞ fagnað. Af því tilefni hafa ungmennaráð Barnaheilla, Save the Children á Íslandi, umboðsmaður barna og Unicef á Íslandi tekið höndum saman um að gera sjónvarpsmynd um Barnasáttmálann og mannréttindi barna. Markmiðið er að auka þekkingu og meðvitund barna og fullorðinna um mannréttindi barna með það fyrir augum að bæta líf barna á Íslandi. Ríkisútvarpið (RÚV) mun sýna myndina þann 20. nóvember 2015 í lok 25 ára afmælisársins. – Styrkþegi: Barnaheill. – Tengiliður: Þóra Jónsdóttir.

2. Hverfisfuglinn okkar. – Fræðsluverkefni ætlað börnum á leikskólaaldri í Dalskóla við bakka Úlfarsár í Úlfársdal.

Dalskóli er nýr skóli á 5. starfsári en einn af hornsteinum hans er umhverfismennt og útikennsla. Inntak verkefnisins er að börnin velja í sameiningu hvaða fuglategund sé hverfisfuglinn þeirra. Valið byggir á athugunum barnanna í kjölfar fræðslu um fuglalíf borgarinnar með áherslu á nánasta umhverfi. Styrkurinn er veittur til tækjakaupa, svo sem sjónauka og myndavéla. – Tengiliður skólans: Sigrún Ásta Gunnlaugsdóttir.

3. Komdu og skoðaðu fuglana. – Fræðslurit um fuglaskoðun ætlað ungum fuglaskoðurum.

Verkefnið byggist á útgáfu fræðslurits um fuglaskoðun, með það að markmiði að auðvelda áhugasömum ungum fuglaskoðurum að skoða okkar algengustu eða skrautlegustu fugla vor og vetur. Fjallað verður um 30 fugla og leitast við að byggja ritið upp á sem myndrænasta hátt. Ritið er ætlað 4. bekkingum grunnskóla og fær hvert barn í árganginum eintak að gjöf. Dreifa á ritinu til bekkjardeilda ásamt kennaraeintaki og bókasafnseintaki. Styrkþegi: Fuglaverndarfélag Íslands / Fuglavernd. – Tengiliður: Hólmfríður Árnadóttir.

4. Strengir á tímaflakki. – Skólatónleikar fyrir börn á Akureyri og nágrenni.

Stjórn Tónlistarfélags Akureyrar telur að sárlega hafi vantað framboð á vönduðum tónleikum fyrir börn á Akureyri og nágrenni síðustu ár. Félagið er í samstarfi við Pamelu de Sensi og er hún listrænn stjórnandi verkefnisins. Tónleikarnir bera yfirskriftina „Strengir á tímaflakki“ og byggja á tónlistarævintýri eftir Pamelu sem Steingrímur Þórhallsson samdi tónlist við. Í ævintýrinu eru hljóðfæri hefðbundins strengjakvartetts kynnt með því að segja sögu. Einnig verður flutt verkið Divertimento K. 136 eftir Mozart. Þátttakendur eru hljóðfæraleikarar, sögumaður og leikari sem leikur Mozart og börn úr dansskóla á Akureyri. Sýningin er ætluð 2ja til 12 ára börnum og fá þau að taka þátt í sýningunni á ýmsan hátt með tali og hreyfingu. Fyrirhugað er að flytja verkefnið á skólatónleikum og þannig gefa öllum börnum á Eyjafjarðarsvæðinu kost á að sjá verkið auk barna frá norð-austur horninu. Styrkþegi: Tónlistarfélag Akureyrar. – Tengiliður: Ásdís Arnardóttir.

5. Stef fyrir stutta putta. – Nótnabók.

„Stef fyrir stutta putta“ er nótnabók með frumsömdum píanólögum fyrir nemendur á fyrri stigum píanónáms eftir Jóhann G. Jóhannsson. Með verkefninu er stefnt að því að auðga fremur fátæklega flóru af innlendu efni fyrir unga píanónemendur með aðgengilegum og skemmtilegum lögum í von um að það verði þeim hvatning og glæði áhuga þeirra á náminu. Bókin verður seld í Tónastöðinni og helstu bókaverslunum. – Höfundur og styrkþegi: Jóhann G. Jóhannsson.

6. Farandnámskeið í myndlist fyrir 5. – 7. bekk í grunnskólum Austurlands 2015 – 2016.

Námskeiðið er á vegum Skaftfells sem er myndlistarmiðstöð Austurlands og gegnir mikilvægu hlutverki þegar kemur að myndlistarfræðslu í fjórðungnum. Eitt af helstu verkefnum miðstöðvarinnar hafa verið fræðsluverkefni fyrir grunnskólanema. Fyrir veturinn 2015-2016 verður lögð áhersla á óhlutbundna list sem tengist fyrirhugðri sýningu á verkum Eyborgar Guðmundsdóttur (1924-1997) í sýningarsal Skaftfells og verða námskeiðin skólunum og börnunum að kostnaðarlausu. – Styrkþegi: Skaftfell – myndlistarmiðstöð Austurlands. – Tengiliður: Tinna Guðmundsdóttir.

7. Málfærni eldri leikskólabarna. – Málþroskapróf.

„Málfærni eldri leikskólabarna (MELB)“ er málþroskapróf, sem ætlað er fyrir fjögurra ára til sex ára börn. Búið er að ganga frá til útgáfu málþroskaprófi sem kannar málfærni ungra barna (MUB), tveggja til fjögurra ára. Samkvæmt niðustöðum rannsókna er sterk fylgni á milli málþroskamælinga við 5 ára aldur og niðurstaðna á samræmdum prófum í íslensku og stærðfræði í 4., 7. og 10. bekk. Þetta þýðir að snemmtæk íhlutun og aðstoð við börn í áhættu getur skipt sköpum fyrir börnin og aðstandendur þeirra. Málþroskapróf gagnast vel til að finna börn sem eiga í erfiðleikum og greina vandann. Styrkurinn er ætlaður til vinnslu á myndefni fyrir málþroskaprófið „Málfærni eldri leikskólabarna (MELB)“. – Styrkþegar: Dr. Þóra Másdóttir, Dr. Jóhanna T. Einarsdóttir og Ingibjörg Símonardóttir.

8. Froskaleikur Hoppa. – smáforrit fyrir spjaldtölvur.

Um er að ræða smáforrit fyrir spjaldtölvur sem ætlað er börnum frá 4 ára til 9 ára. Smáforritinu er ætlað að undirbúa þroskaþætti er tengjast rökhugsun, málskilningi og grunnhugtökum. Börn með seinkun í þroska geta nýtt efnið langt fram eftir aldri og gætt verður að því að myndir henti breiðum aldurshópi og hafi ekki of menningarlega skírskotun. Markmið umsækjanda er að þróa og gefa út íslenskt smáforrit í spjaldtölvu sem þjálfar grunnhugtök sem mikilvæg eru í málþroska og stærðfræði. Að þróa og gefa út íslenskt smáforrit er mikilvægt framlag til viðhalds íslenskunni sem málminnihlutasamfélags í ört vaxandi tækniheimi. – Styrkþegi: Bryndís Guðmundsdóttir.

9. Orðagull. – Smáforrit.

Smáforritið kemur til með að byggja að mestu á verkefnum sem eru í málörvunarefninu Orðagull, málörvunarefni sem styrkir vinnsluminni, heyrnræna úrvinnslu, orðaforða og endursögn. Málörvunarefnið var gefið út 2010 og hefur notið mikillar hylli meðal foreldra, leik- og grunnskólakennara. Í smáforritinu er gert ráð fyrir að hægt sé að halda utan um skráningu og mat á árangri nemenda. – Styrkþegi: Bjartey Sigurðardóttir.

10. SOL – Syngjum Og Leikum.

Verkefnið felst í að þýða, staðfæra og gefa út SOL (Sprog Og Lege) bókina úr dönsku. Bókin inniheldur 127 leiki sem ætlaðir eru til að þjálfa málþroska barna. Bókin er ætluð leikskólakennurum og foreldrum. Markmiðið með útgáfu bókarinnar era að auðvelda leikskólakennurum að byggja upp á skipulagðan hátt málörvun í leikskólum. – Styrkþegi: SOL hópurinn. – Tengiliðir: Hrafnhildur Karlsdóttir og Hólmfríður Árnadóttir.

11. Æskusirkus Íslands.

Árið 2009 stofnaði Sirkus Íslands Æskusirkusinn sem starfar allan ársins hring. Sirkuslistir þjálfa óteljandi hæfileika barna og flétta m.a. saman líkamsstyrk, sjálfsöryggi, leikgleði, framkomu, einbeitingu og samhæfni. Haldin eru námskeið fyrir börn á aldrinum 8 til 15 ára þar sem þau kynnast sirkuslistum og í lok námskeiða eru haldnar sýningar. Styrknum er ætlað að gera Sirkusi Íslands kleift að halda úti Æskusirkusnum.– Styrkþegi: Sirkus Íslands. – Tengiliður: Ragnheiður Maísól Sturludóttir.

Styrkir 2016 | Rósa Björg | Page 2

Afhending styrkja

Í ár bárust Sumargjöf 40 áhugaverðar og fjölbreyttar umsóknir um styrki á sviði rannsókna, lista og þróunarverkefna í þágu barna. Stjórn Sumargjafar hefur samþykkt að styrkja 11 verkefni. Formleg afhending styrkja fer fram 3. maí kl. 14:00 í leikskólanum Grænuborg, Eiríksgötu 2. Styrkhafar hafa fengið tilkynningu og boð um að veita styrkjunum móttöku. Stjórn Sumargjafar þakkar öllum umsækjendum fyrir að hafa sótt um. Umsækjendur sem ekki hlutu styrk að þessu sinni verður tilkynnt um það.